ابوظہبی …پاکستان اور انگلینڈ کی کرکٹ ٹیموں کے درمیان تین میچوں پرمشتمل سیریز کا دوسرا ٹیسٹ میچ بدھ سے شیخ زید کرکٹ اسٹیڈیم ابوظہبی میں شروع ہوگا۔ میچ میں شرکت کے لیے دونوں ٹیمیں ابوظہبی پہنچ چکی ہیں اور میچ کے لیے پریکٹس میں مشغول ہیں۔ پاکستان کو انگلینڈ کے خلاف سیریز میں 1-0 کی برتری حاصل ہے۔پاکستان ٹیم نے پہلے میچ میں انگلینڈ کو 10 وکٹوں سے شکست دی تھی۔ پاکستان ٹیم کے کپتان مصباح الحق نے کہا ہے کہ انکی ٹیم مکمل طور پر فٹ اور بھر پور فارم میں ہے اور انگلینڈ کو دوسرے کرکٹ ٹیسٹ میچ میں بھی شکست دیکر سیریز 2-0 سے اپنے نام کرے گی۔ انہوں نے کہا کہ وہ پہلے میچ میں کامیابی پر بہت خوش ہیں۔ انہوں نے کہا کہ انگلینڈ کے خلاف پہلے میچ میں کامیابی ٹیم کی اجتماعی کوششوں کا نتیجہ ہے اور ٹیم سیریز اپنے نام کرنے کے لیے ایسی ہی حکمت عملی کے تحت دوسرے ٹیسٹ کے لیے میدان میں اتاریں گے۔ دونوں ٹیموں کے درمیان سیریز کا تیسرا اور آخری ٹیسٹ میچ 3 سے 7 فروری کو انٹرنیشنل کرکٹ سٹیڈیم دبئی میں کھیلا جائیگا۔