ملتان … پاکستان پیپلز پارٹی کے ایم این اے جمشید دستی کا کہنا ہے کہ مسلم لیگ ن کے خلاف پیپلز پارٹی کے کارکن 13 مئی کو مظفر گڑھ سے ملتان تک علامتی لانگ مارچ کریں گے۔ یہ بات انہوں نے ملتان پریس کلب میں پریس کانفرنس کرتے ہوئے کہی۔ ان کا کہنا تھا کہ میاں نواز شریف نے تیسری بار وزیر اعظم بننے کی شرط ختم کرنے پر اے این پی کو صوبہ سرحد کا نام تبدیل کرنے کی اجازت دی۔ جمشید دستی کا کہنا تھا کہ جنوبی پنجاب صوبہ بنانے کیلئے کا فی عرصے سے مسلم لیگ ن سے آف دی ریکارڈ بات ہو رہی تھی لیکن شریف برادران پنجاب سے اپنی اجارہ داری کھونے کے خوف سے جنوبی پنجاب کو صوبہ نہیں بننے دے رہے اور چند سازشی عناصر صوبہ بہاولپور کی بات کر رہے ہیں۔ جمشید دستی کا کہنا تھا کہ جب سے وزیر اعظم یوسف رضا گیلانی نے جنوبی پنجاب صوبہ بنانے کی بات کی ہے تب سے مسلم لیگ ن کو وزیر اعظم کی کرپشن نظر آگئی، 4سال سے وہ خاموش کیوں تھے اب شور صرف اس لئے مچایا جا رہا ہے کہ کہیں جنوبی پنجاب صوبہ بن گیا تو تخت لاہور کی سلطنت چھوٹی نہ ہو جائے