اسلام آباد........این این آئی........وزیر اعظم محمد نواز شریف نے پشاور کے معصوم بچوں کے قاتلوں کو سزا سنائے جانے پر دلی اطمینان کا اظہار کرتے ہوئے کہا ہے کہ دہشتگردی کی کمر توڑنے میں ہماری فوج کا کردار مثالی ہے۔ پاکستان سے دہشتگردی کا جلد خاتمہ ہوگا، فوجی عدالتوں کے قیام کا فیصلہ مشکل تھا، ملک کی خاطر کیا ٗ مجرمانہ اور منافقانہ کارروائیوں کا پاکستان سے جلد خاتمہ ہو جائے گا۔ فوجی عدالتوں کی جانب سے سانحہ پشاور اور سانحہ صفورہ کے مجرمان کو دی گئی سزائوں پر ردعمل کا اظہار کرتے ہوئے وزیراعظم محمد نواز شریف نے کہا کہ مجھے یہ جان کر اطمینان ہوا کہ پشاور کے معصوم اور ننھے سے پھولوں کو بے دردی اور بہیمانہ طور پر شہید کرنے والے درندے کیفر کردار کو پہنچے۔ یہ پیارے شہید بچے والدین کو واپس تو نہ مل سکیں گے لیکن دہشت گردوں کی سزائوں سے ہم سب کو اور والدین کو یہ تو احساس ہو رہا ہے کہ مجرمانہ اور منافقانہ کارروائیوں کا انشاء اللہ پاکستان سے عنقریب مکمل خاتمہ ہوجائے گا۔ وزیر اعظم نواز شریف نے کہا کہ پارلیمنٹ، سپریم کورٹ اور فوجی عدالتوں نے اس سلسلے میں اپنا اپنا کردار جس طریقہ سے ادا کیا وہ قابل تحسین ہے۔ تمام جمہوری جماعتوں نے اپنے اختلافات بالائے طاق رکھ کر حکومت کے ساتھ فوجی عدالتوں کے قیام کے سلسلے میں قانون سازی میں جو تعاون کیا، اُس کے نتائج مجرموں کو قرار واقعی سزائوں کے ملنے کے باعث دہشت گردی کے خاتمے کی صورت میں سامنے آرہے ہیں۔ وزیر اعظم کا کہنا تھا کہ فوجی عدالتوں کے قیام کا فیصلہ ایک مشکل فیصلہ تھا، لیکن قوم کے روشن مستقبل کی خاطر ہم نے یہ فیصلہ کیا، ملک کے تمام مسائل کا حل جمہوری اقدار کو بلند کرتے ہوئے تمام اداروں کے باہمی تعاون سے ہی ممکن ہے۔ اس سلسلے میں دہشت گردی کی کمر توڑنے میں ہماری افواج کا کردار بھی مثالی ہے۔ انہوں نے کہا کہ مجھے یقین ہے کہ وہ دن دور نہیں جب ہم اتحاد اور باہمی تعاون سے ملک کے مسائل حل کرنے میں انشاء اللہ کامیاب ہو جائیں گے۔ آج کا یوم آزادی امن وامان کے حوالے سے پچھلے یوم آزادی سے کئی درجے بہتر اور پرامن ہے اور میری اللہ سے دُعا ہے کہ اگلا آنے والا یوم آزادی دہشت گردی اور انتہا پسندی سے پاک ہو۔