حج کا رکن اعظم وقوف عرفات ادا کیا جارہا ہے۔ دنیا بھر سے آئے لاکھوں عازمین طلوع آفتاب کے بعد منیٰ سے میدان عرفات پہنچے، عازمین حج میدان عرفات میں خطبہ حج سنیں گے۔

سعودی عرب کے مفتی اعظم عبدالعزیز آل سعود الشیخ علالت کے سبب اس سال حج کا خطبہ نہیں دے سکیں گے۔ان کی جگہ امام حرم کعبہ صالح بن حمید مسجد نمرہ میں حج کا خطبہ دیں گے ۔ 35 سال میں پہلا موقع ہے جب سعودی مفتی اعظم عبدالعزیز آل سعود الشیخ خطبہ حج نہیں دے سکیں گے۔

خطبہ حج کے بعد حجاج کرام ظہر اور عصرکی قصر نماز اداکریں گے ۔ میدان عرفات میں ہی سورج غروب ہونے تک اللہ تعالیٰ کا ذکر، دعا اور استغفار کیا جائے گا۔ سورج غروب ہونے کے بعد حاجی مزدلفہ روانہ ہوں گے، فجر تک وہیں قیام کریں گے۔

دس ذی الحج کو نماز فجر کے بعد سورج طلوع ہونے تک حجاج ذکر الٰہی اور دعا میں مصروف رہیں گے۔ پھرشیطان کو کنکریاں ماریں گے، جس کے بعد قربانی کی جائے گی، مرد اپنا سر منڈوائیں گے اور خواتین تھوڑے سے بال کٹوائیں گی۔

حجاج کرام طواف زیارت کے لیےمکہ جائیں گے۔ منیٰ واپس آکر وہاں11، 12 ذوالحج کی شب قیام کریں گے اورہر دن تینوں جمرات پر شیطانوں کو كکنکریاں ماری جائیں گی۔