دریائے سندھ میں پائی جانے والی نایاب نسل کی بلائنڈ ڈولفن کی بقا کو خطرات لاحق ہوگئے، سکھر بیراج سے نکلنے والی نہروں پر مچھلیوں کے شکار کے لیے بڑے بڑے جال لگائے جاتے ہیں لیکن متعلقہ اداروں نے چپ سادھ رکھی ہے۔

محکمہ وائلڈ لائف کے مطابق دریائے سندھ اور سکھر بیراج سے نکلنے والی نہروں میں ہر سال نایاب نسل کی کئی بلائنڈ ڈولفن مچھیروں کے جالوں میں پھنس کر مرجاتی ہیں۔

دریائے سندھ میں گڈو سے سکھر بیراج تک کا حصہ ڈولفن گیم ریزرو ہے جہاں ڈولفن کو نقصان پہنچانے والی سرگرمیوں پر مکمل پابندی عائد ہے۔

پابندی پر عمل درآمد کرانا محکمہ آب پاشی کی ذمے داری ہے، اس کے باوجود یہاں مچھیرے بڑے بڑے جال لگاتے ہیں، ڈپٹی کنزر ویٹر محکمہ وائلڈ لائف تاج محمد شیخ کا کہنا ہے کہ یہ صورت حال محکمہ آب پاشی، محکمہ جنگلی حیات اور فشریز کی کارکردگی پر سوالیہ نشان ہے۔