چالیس سال پہلے سسر اور داماد کا کردار پھر اسکرین پر بھائی بھائی کی جوڑی جمائی پھر دوست بنے اور اب باپ اور بیٹا۔جی ہاں! امیتابھ اور رشی کپور نئی فلم 102ناٹ آوٴٹ میں باپ اور بیٹے کے کردار میں نظر آئیں گے۔

دونوں چالیس سال پہلے فلم ”کبھی کبھی“ میں پہلی بار ایک ساتھ اسکرین پر نظر آئے،ایک سال بعد ہی ”امر اکبر انتھونی“ میں ایسے بھائی بنے کہ” نصیب “ اور ”قلی“ میں بھی بھائیوں کی جوڑی جمائی۔امر اکبر انتھونی میں ونود کھنہ امیتابھ اور رشی کپور کے سب سے بڑے بھائی بنے تھے۔ ”لمبوجی اور ٹنگو جی“ فلم قلی کا ہی مشہور گانا ہے۔

چھبیس سال پہلے دونوں نے آخری بار فلم ”عجوبہ“ میں کام کیا ۔یہ ان دونوں اسٹارز کی پہلی ناکام فلم تھی۔دونوں اسٹارز ایک دوسرے سے بہت مختلف ہیں ۔قد کاٹھ،آواز،اداکاری اور اسٹائل سب بالکل الگ۔امیتابھ ایک طرف ایکشن فلموں کے شہنشاہ تھے تو رشی کپور رومانوی فلموں کے شاہ زادے تھے۔

امیتابھ عمر میں رشی کپور سے پورے دس سال بڑے ہیں لیکن امیتابھ کی پہلی فلم ”سات ہندوستانی“1969میں ریلیز ہوئی تو رشی کپور نے 1970میں ”میرا نام ہے جوکر“ میں اہم کردار ادا کیا۔تین سال بعد دونوں اسٹارز کی قسمت ایک ساتھ جاگی1973میں امیتابھ کی ’زنجیر“ نے سب کو اسکرین پر باندھ دیا تو دوسری طرف رشی کپور کی ”بوبی“ نے تہلکہ مچادیا۔

دلچسپ بات یہ ہے کہ ”بوبی“ نے باکس آفس پر زنجیر سے زیادہ کمائی کی اور تو اوراس سال کے فلم فیئر ایوارڈز کی تقریب میں بہترین اداکار کا ایوارڈ بھی رشی کپور لے اڑے امیتابھ کو زنجیر سے تو کوئی ایوارڈ نہیں ملا لیکن ”نمک حرام“ نے بگ بی کو پہلا فلم فیئر ایوارڈ بطور معاون اداکار دلوادیا۔

لمبو جی اور ٹنگو جی دونوں نے جیون ساتھی کیلئے فلم اسٹار کا ہی انتخاب کیا۔امیتابھ بچن کی شادی جیہ بہادری سے ہوئی ۔رشی کپور کی دلہنیا نیتو سنگھ بنیں۔ نیتو سنگھ اور جیہ بچن دونوں نے شادی کے بعد فلمی دنیا کو خیر آباد کہہ دیا۔

نیتو سنگھ نے 26سال بعد فلموں میں دوبارہ اینٹری دی اور” لو آج کل“، دو دونی چار، جب تک ہے جان اور بے شرم میں اپنے سرتاج رشی کپور کے مدمقابل ہی کردار ادا کیے۔جیہ بچن نے 1981میں فلم سلسلہ کے بعد فلموں میں کام کرنے کا سلسلہ توڑا اور پھر 18سال بعد فلموں میں واپسی کی۔

دلچسپ اتفاق ہے کہ امیتابھ اور رشی کپور دونوں ہیروز کے دو بچے ہیں، ایک بیٹی اور دوسرا بیٹا۔ دونوں کی بیٹی گھر میں بڑی،شادی شدہ اور فلموں سے دور ہیں۔امیتابھ بچن کے بیٹے ابھی شیک بچن کی بھی شادی ہوگئی اور ایشواریہ رائے ان کے پریوار کی بہو بن کر آئیں۔اس معاملے میں رشی کپور تھوڑے سے پیچھے رہے کیونکہ رنبیر پہلے دپیکا اور پھر کترینا کو افیئر کے بعدبیگم نہیں بناسکے۔اب ”جگا جاسوس“ بن کر اپنی دلہنیا کو تلاش کر رہے ہیں۔

ایک اور دلچسپ بات یہ کہ امیتابھ اور رشی کپور پرانے رشتے دار بھی ہیں۔بگ بی کی بیٹی ”شویتا نندا“ رشی کپور کی بڑی بہن ”ریتو نندا“ کی بہو ہیں۔اسی طرح ایک وقت میں ابھی شیک اور کرشمہ کپور کی رشتے داری ہوتے ہوتے رہ گئی تھی۔ایسا ہوجاتا تو رشی کپور ابھی شیک کے چچا سسر بن جاتے ۔

”کبھی کبھی “ ساتھ کام کرنے والوں کی اتنی ”فلمی “اور” رئیل“ رشتے داری ،دوستی اور” نصیب“ میں اب ایک نیا رشتہ آگیا ہے وہ بھی باپ اور بیٹے کا۔102ناٹ آوٴٹ میں امیتابھ کا کردار 102سال کے والد کا ہوگا۔

رشی کپور ان کے ”کھڑوس“ بیٹے کا کردار ادا کریں گے جس کی عمر 70سال ہوگی۔فلم کے ڈائریکٹر ”او مائی گاڈ“ اور ”آل از ویل“ بنانے والے اومیش شکلا ہیں۔102ناٹ آوٴٹ اگلے سال ریلیز ہوگی۔