سرفراز احمد کو اسپاٹ فکسنگ کی پیشکش کرنیوالا شارجہ اسٹیڈیم کا ملازم نکلا

دبئی: قومی ٹیم کے کپتان سرفراز احمد کو اسپاٹ فکسنگ کی پیشکش کا انکشاف ہوا ہے اور انہیں یہ پیشکش کرنے والا مبینہ طور پر شارجہ اسٹیڈیم کا پاکستانی ملازم نکلا۔

گزشتہ روز قومی ٹیم کے اہم کھلاڑی کو سٹے بازوں کی جانب سے اسپاٹ فکسنگ کی پیشکش کا انکشاف ہوا تھا تاہم اس کھلاڑی کا نام سامنے نہیں آسکا تھا۔

ذرائع کا کہنا ہےکہ دبئی میں اسپاٹ فکسنگ کی یہ پیشکش قومی ٹیم کے کپتان سرفراز احمد کو کی گئی جو سری لنکا کے خلاف دوسرے ون ڈے سے پہلے کی گئی۔

اسپاٹ فکسنگ: سٹے بازوں کا اہم پاکستانی کرکٹر سے رابطہ، کھلاڑی نے بورڈ کو بتا دیا

ایک اہم ترین کھلاڑی سے سٹے باز نے رابطہ کیا اور اسے اسپاٹ فکسنگ کی پیشکش کی جس پر کرکٹر نے ذمہ داری کا مظاہرہ کیا، ذرائع

ذرائع کے مطابق قومی ٹیم دبئی میں جس ہوٹل میں قیام پذیر ہے اسی ہوٹل میں شاپنگ مال بھی موجود ہے جہاں سرفراز احمد اپنی فیملی کے ہمراہ تھے تو اس دوران ایک مشکوک شخص نے انہیں روکا اور بات کرنا چاہیے جس پر سرفراز احمد اسے اپنا مداح سمجھے۔

ذرائع نے بتایا کہ یہ مشکوک شخص حلیے سے پاکستانی معلوم ہوتا تھا اور اس نے سرفراز احمد کو میچ سے پہلے اسپاٹ فکسنگ کی پیشکش کی۔

ذرائع کے مطابق سرفراز احمد نے ذمہ داری کا مظاہرہ کرتے ہوئے اگلے ہی روز اس بات سے پاکستان کرکٹ بورڈ کے اینٹی کرپشن یونٹ کو آگاہ کیا جب کہ انہوں نے لاہور میں ڈائریکٹر سیکیورٹی کرنل اعظم کو بھی پیشکش سے متعلق بتایا۔

ذرائع نے بتایا کہ واقعے کے بعد دبئی میں مشکوک افراد کی نگرانی سخت کردی گئی ہے اور پاکستان ٹیم کے دیگر کھلاڑیوں کو غیر متعلقہ لوگوں سے دور رہنے کی ہدایت کی گئی ہے۔

سرفراز کو پیشکش کرنے والے کا نام سامنے آگیا

دوسری جانب ذرائع کا کہنا ہےکہ سرفراز احمد کو اسپاٹ فکسنگ کی پیشکش کرنے والا شارجہ اسٹیڈیم کا پاکستانی ملازم ہے جو کراچی کا رہائشی ہے۔

ذرائع نے بتایا کہ عرفان نامی شخص ماضی میں شارجہ اسٹیڈیم میں گراؤنڈ سے متعلق امور دیکھتا رہا ہے اور اس نے سرفراز احمد کو یہ پیشکش کی۔

ذرائع کا کہنا ہےکہ عرفان مقامی آرگنائز ہے اور اب وہ آفیشل طور پر شارجہ اسٹیڈیم کا ملازم نہیں تاہم وہ نجی حیثیت میں نیٹ پریکٹس کے لیے آنے والی ٹیموں کے بلے بازوں کو مقامی بولر فراہم کرنے کا کام کرتا ہے۔

ذرائع کے مطابق سرفراز نے ٹیم مینجمنٹ کو بتایا کہ عرفان نے مبینہ طور پر  سری لنکا سے ٹی ٹوئنٹی سیریز کے دوران بولر چینج کرنے اور اس کے پلان کے مطابق چلنے کا کہا جب کہ معقول پیش کش بھی کی جس پر سرفراز نے اسے نہ صرف رد کیا بلکہ اس کے ساتھ سختی سے پیش آئے۔

ذرائع کے مطابق اسپاٹ فکسنگ کی پیشکش پرشارجہ اسٹیڈیم کے پاکستانی ملازم عرفان کے خلاف کارروائی کا فیصلہ کرلیا گیا ہے جو یو اے ای کے قوانین کےمطابق کی جائے گی جب کہ آئی سی سی اور پی سی بی کے اینٹی کرپشن کوڈ کے تحت بھی اس کے خلاف کارروائی کی جائے گی۔

تحقیقات آئی سی سی کے سپرد

پاکستان کرکٹ بورڈ نے اسپاٹ فکسنگ کے معاملے کی تحقیقات انٹرنیشنل کرکٹ کونسل کے اینٹی کرپشن یونٹ کے سپرد کردی ہے۔

ذرائع کے مطابق آئی سی سی کے اینٹی کرپشن یونٹ کی سرفراز احمد سے آج ملاقات کا امکان ہے جس میں ان کا تفصیلی انٹرویو لیا جائے گا جب کہ آئی سی سی کی ٹیم قومی ٹیم کے مینیجر، کوچ اور دیگر کھلاڑیوں کے بھی انٹرویو کرے گی۔

ذرائع کا کہنا ہےکہ اینٹی کرپشن ٹیم کھلاڑیوں اور مینجمنٹ سے پیشکش سے متعلق تفصیلات لے گی جب کہ اسپاٹ فکسنگ کی پیشکش کرنےو الے شخص کا بھی انٹرویو کیا جائے گا جس کے بعد ٹیم اپنی رپورٹ مرتب کرے گی اور ان سفارشات کی روشنی میں ذمہ داروں کے خلاف کارروائی کی جائے گی۔

ذرائع کے مطابق اس معاملے بھی تاحال دبئی پولیس کو شامل نہ کرنے کا فیصلہ کیا گیا ہے۔

ایک کھلاڑی سے سٹے باز نے رابطہ کیا تھا، نجم سیٹھی

پاکستان کرکٹ بورڈ کے سربراہ نجم سیٹھی نے بھی تصدیق کی ہے کہ ایک کھلاڑی سے سٹے باز نے رابطہ کیا تھا ، جس پر کھلاڑی نے فوری طور پر پی سی بی حکام کو آگاہ کردیا ۔

نجم سیٹھی کا کہنا ہے کہ پی سی بی نے آئی سی سی حکام کو بھی اس بارے ميں بتادیا ہے ، اور اب پی سی بی اور آئی سی سی حکام اس معاملے کی مل کر تحقیقات کررہے ہیں ۔

اسپاٹ فکسنگ کیس: خالد لطیف پر 5 سال کی پابندی عائد

پی سی بی کے اینٹی کرپشن ٹریبونل نے خالد لطیف پر 10 لاکھ روپے جرمانہ بھی عائد کیا ہے

اسپاٹ فکسنگ کیس: شرجیل خان پر 5 سال کی پابندی عائد

شرجیل خان کے وکیل نے فیصلے کے خلاف اپیل دائر کرنے کا اعلان کردیا