27 مارچ ، 2018 
محمد آصف دبئی ایئرپورٹ سے ڈی پورٹ، ٹیپ بال ٹورنامنٹ میں شرکت نہ کرسکے
27 مارچ ، 2018
اسپاٹ فکسنگ کیس میں سزا یافتہ متنازع فاسٹ بولر محمد آصف نے اپنی سزا تو پوری کرلی ہے لیکن ان کا ستارہ بدستور گردش میں دکھائی دے رہا ہے اور وہ مسائل اور مشکلات سے باہر نہیں آ پا رہے۔
محمد آصف کو گذشتہ دنوں دبئی میں اُس وقت پریشانی کا سامنا کرنا پڑا جب انہیں دبئی ایئرپورٹ سے ڈی پورٹ کردیا گیا اور وہ چند گھنٹے ایئرپورٹ پر امیگریشن حکام کی حراست میں رہنے کے بعد شارجہ میں ٹیپ بال ٹورنامنٹ کھیلے بغیر وطن واپس آگئے۔
واضح رہے کہ محمد آصف 10 سال قبل آخری مرتبہ دبئی گئے تھے۔ پرانے کیس کی وجہ سے 10 سال کے دوران انہوں نے متحدہ عرب امارات کا سفر کرنے سے گریز کیا تھا۔
حد درجہ مصدقہ ذرائع کا کہنا ہے کہ 2007 میں محمد آصف کو دبئی ایئرپورٹ پر اُس وقت پولیس نے حراست میں لیا تھا جب ان کی جیب سے منشیات برآمد ہوئی تھی۔
محمد آصف آئی پی ایل کھیل کر وطن واپس آرہے تھے، تاہم اُس وقت تلاشی کے دوران ان کی جیب سے افیون برآمد ہوئی تھی۔ وہ 2 ہفتے دبئی پولیس کی حراست میں رہے تاہم اُس قت کے چیئرمین پی سی بی ڈاکٹر نسیم اشرف نے شاہی خاندان سے اپنے تعلقات کی بنا پر انہیں رہائی دلوائی۔
ذرائع کا کہنا ہے کہ محمد آصف نے شارجہ میں ایک ٹیپ بال ٹورنامنٹ کھیلنے کا معاہدہ کیا تھا تاہم جب وہ لاہور ایئرپورٹ سے دبئی ایئرپورٹ پر اترے تو اسکیننگ کے دوران انہیں امیگریشن حکام نے دبئی میں داخلے کی اجازت نہیں دی۔ اس دوران وہ امیگریشن حکام کی حراست میں رہے اور بعدازاں انہیں ڈی پورٹ کرکے پاکستان واپس بھیج دیا گیا۔ محمد آصف ڈی پورٹ ہونے کی وجہ سے ٹورنامنٹ میں بھی شرکت نہیں کرسکے۔
نمائندہ جیو نیوز نے اس بارے میں جب محمد آصف سے رابطہ کیا تو انہوں نے ڈی پورٹ ہونے کی تصدیق کی اور بتایا کہ انہیں دبئی جانے کے لیے اسپیشل ویزہ درکار تھا اور منتظمین نے ان کا نام کلیئر کرا کر انہیں ویزہ دلایا تھا۔
محمد آصف کے مطابق 'جب میں دبئی پہنچا تو مجھ سے وزارت خارجہ کا لیٹر مانگا گیا، جو کہ ابوظہبی سے ملنا تھا'۔
انہوں نے بتایا کہ 'میری کلیئرنس ہونے کے بعد مجھے ویزہ ملا تھا لیکن لیٹر نہ ہونے کی وجہ سے مجھے متحدہ عرب امارات میں داخل ہونے کی اجازت نہیں مل سکی'۔
محمد آصف اسپاٹ فکسنگ کیس میں 5 سال کی سزا کاٹنے کے باوجود پاکستانی ٹیم میں منتخب نہیں ہوسکے ہیں۔ وہ ڈوپ ٹیسٹ میں بھی سزا کاٹ چکے ہیں۔
محمد آصف قومی سیزن میں واپڈا کی جانب سے کھیلتے ہیں۔ تینوں پی ایس ایل میں ان سے کسی ٹیم نے معاہدہ نہ کیا۔ اب مایوس ہو کر انہوں نے ایمیچر ٹیپ بال کرکٹ کا معاہدہ کرلیا۔
کبھی وینا ملک اور کبھی کرکٹ اسکینڈلز کی زد میں رہنے والے محمد آصف کا کیریئر تنازعات سے بھرپور ہے۔ ان اسکینڈلز کی وجہ سے میچ ونر بولر کا کیریئر اب خاتمے کے قریب ہے اور پاکستان ٹیم میں نئے بولروں نے ان کی جگہ لے لی ہے۔
