02 مئی ، 2018 
کراچی: گلشن اقبال کے پارک میں ورزش کرنے پر پابندی عائد
02 مئی ، 2018
کراچی کے ایک پارک میں یوگا اور دیگر اقسام کی ورزش پر پابندی عائد کردی گئی۔
یہ پابندی شہر قائد کے علاقے گلشن اقبال کے ناصر حسین پارک میں پارک انتظامیہ کی جانب سے عائد کی گئی ہے۔
علاقہ مکینوں کے مطابق وہ ناصرحسین پارک میں یوگا اور دیگر کسی قسم کی ورزش نہیں کرسکیں گے، انہیں صرف جاگنگ اور واک کرنے کی اجازت ہوگی۔
مکینوں کا کہنا ہے کہ پارک میں ورزش پر پابندی سمجھ سے بالاتر ہے، صبح سویرے باپردہ خواتین بھی پارک آکر یہاں ورزش کرتی تھیں تاہم اب پابندی عائد کردی گئی ہے۔
ادھر چیئرمین ضلع شرقی نے کہا کہ پارک میں ورزش پر پابندی پارک کی کمیٹی نے لگائی ہے، ضلعی انتظامیہ کا اس سے کوئی تعلق نہیں۔
انہوں نے بتایا کہ متعلقہ یوسیز پارکس کمیٹیاں بناتی ہیں، جنہیں پابندیاں عائد کرنے کا بھی اختیار ہوتا ہے۔
