زینب قتل کیس: سپریم کورٹ میں ملزم عمران کی سزا کیخلاف اپیل سماعت کیلئے مقرر
02 جون ، 2018
لاہور: چیف جسٹس پاکستان جسٹس ثاقب نثار نے زینب قتل کیس کے ملزم عمران کی سزا کے خلاف اپیل سماعت کے لیے مقرر کردی۔
سپریم کورٹ لاہور رجسٹری میں کیس کی سماعت کے دوران چیف جسٹس پاکستان ثاقب نثار نے قصور کی زینب قتل کیس میں ملزم عمران کی سزا کے خلاف اپیل سماعت کے لیے منظور کی۔
سپریم کورٹ کے جج جسٹس آصف سعید خان کھوسہ کی سربراہی میں 3 رکنی فل بنچ آئندہ ہفتے اپیل پر سماعت کرے گا۔
اس موقع پر چیف جسٹس آف پاکستان نے زینب کے والد حاجی امین سے سکیورٹی واپس لینے کا حکم دیا۔
چیف جسٹس نے کہا کہ آپ کو اب سکیورٹی کی کوئی ضرورت نہیں، جس سے خطرہ تھا وہ جیل میں ہے۔
علاوہ ازیں سپریم کورٹ نے زیادتی کی شکار کائنات کے علاج اور معاوضے سے متعلق رپورٹ کل طلب کرلی۔
اس حوالے سے چیف سیکریٹری پنجاب کا کہنا تھا کہ کائنات کا علاج پاکستان سمیت پوری دنیا میں ممکن نہیں ہے کیوں کہ کائنات علاج کی اسٹیج سے گزر چکی ہے لہٰذا اس کی دیکھ بھال ہو سکتی ہے علاج ممکن نہیں۔
یاد رہے کہ 20 مارچ کو لاہور ہائیکورٹ نے زینب قتل کیس کے مجرم عمران کی سزائے موت کے خلاف اپیل خارج کردی تھی۔
واضح رہے کہ رواں برس جنوری میں پنجاب کے ضلع قصور میں کمسن زینب کو زیادتی کے بعد قتل کیا گیا تھا اور اس واقعے کے خلاف قصور بھر میں مظاہرے کیے گئے جب کہ چیف جسٹس پاکستان نے واقعے کا از خود نوٹس لیا تھا، پنجاب پولیس نے ڈی این اے کے ذریعے ملزم عمران کو گرفتار کیا تھا۔
