فرانسیسی حکومت کا پرتشدد عوامی احتجاج کے بعد نئے ٹیکسز واپس لینے کا فیصلہ

پیرس: فرانسیسی حکومت نے پرتشدد عوامی احتجاج کے بعد ایندھن پر عائد کردہ ٹیکسز واپس لینے کا فیصلہ کرلیا۔

غیرملکی خبر رساں ادارے رائٹر کے مطابق حکومتی ذرائع کا کہنا ہے کہ وزیراعظم ایڈوارڈ فلپ آج ٹیکسز کی منسوخی کا اعلان کریں گے۔

ٹیکسز کی منسوخی کے حکومتی فیصلے کو صدر ایمانیول میکرون کے 2017 میں برسراقتدار آنے کے بعد پہلا یوٹرن قرار دیا جارہا ہے۔

فرانس:ایندھن کی قیمت بڑھنے کیخلاف پرتشدد احتجاج، ایمرجنسی نافذ کرنے پرغور

پیرس میں مظاہرین نے کئی مقامات پر توڑپھوڑ، جلاؤگھیراؤ، درجنوں گاڑیاں اور عمارتیں جلادی ہیں، پولیس سے جھڑپوں میں 17 سیکیورٹی اہلکاروں سمیت 110 افراد زخمی ہوئے، 260 سے زائد مظاہرین گرفتار

شہریوں کی جانب سے حکومت کی جانب سے ڈیزل پر عائد کردہ ٹیکسز اور اشیا ضروریہ کی قیمتوں میں اضافے کے لیے 17 نومبر کو احتجاج شروع ہوا، 'ییلو ویسٹ' کے نام سے کیے جانے والے احتجاج نے مختلف شہروں سمیت دارالحکومت پیرس کو بھی اپنی لپیٹ میں لیا۔

پرتشدد مظاہرین نے پیرس میں جلاؤ گھیراؤ اور توڑ پھوڑ بھی کی جب کہ پولیس اور مظاہرین کے درمیان جھڑپوں کے نتیجے میں سیکڑوں افراد زخمی بھی ہوئے۔

میکرون حکومت کا کہنا ہے کہ ماحول کو محفوظ بنانے اور ماحولیاتی تبدیلی سے لڑنے کے لیے ڈیزل پر ٹیکسز لگانا ضروری ہے۔ 

مظاہرین کا مؤقف ہے کہ صدر ایمانیول میکرون نے پالیسیاں امیر طبقے کے مفاد کے لیے ہیں۔