17 جنوری ، 2019 
’آصف زرداری نجومی بننے کے بجائے اپنی کرپشن کا حساب دیں‘
17 جنوری ، 2019
وزیر اطلاعات پنجاب فیاض الحسن چوہان نے پیپلز پارٹی کے صدر کو تنقید کا نشانہ بناتے ہوئے کہا ہے کہ آصف علی زرداری نجومی بننے کے بجائے اپنی کرپشن کا حساب دیں۔
سابق صدر آصف علی زرداری نے اپنے ایک بیان میں عمران خان کو حادثاتی وزیراعظم قرار دیتے ہوئے پیش گوئی کی کہ عمران خان 5 سال پورے نہیں کر سکتے۔
سابق صدر کے بیان پر ردعمل دیتے ہوئے صوبائی وزیر اطلاعات نے کہا کہ عمران خان کو حادثاتی وزیراعظم کہنے والے زرداری خود بینظیر بھٹو کے حادثے کی بنیاد پر صدر بنے۔
انہوں نے کہا کہ پی ٹی آئی کی حکومت پورے تزک و احتشام سے اپنے 5 سال پورے کرے گی۔
ان کا کہنا تھا کہ آصف زرداری نجومی بننے کے بجائے اپنی کرپشن کا حساب دیں۔
فیاض الحسن چوہان نے کہا کہ جعلی اکاؤنٹس فیصلے پر زرداری، مراد علی شاہ اور بلاول کے پاؤں تلے سے زمین سرک گئی ہے۔
ان کا کہنا تھا کہ آصف زرداری اور مراد علی شاہ جلسیاں، جلسیاں کھیل کر این آر او کی ناکام کوشش کر رہے ہیں۔
پنجاب کے وزیر اطلاعات نے کہا کہ ن لیگ اور پیپلز پارٹی سے دوستانہ کرکٹ میچ تو ہو سکتا ہے لیکن میل ملاپ اور مفاہمت کی سیاست ممکن نہیں۔
انہوں نے مزید کہا کہ اپوزیشن کرپشن میں تو تحریک انصاف سے جیت سکتی ہے لیکن کرکٹ میچ میں ہمار ے ساتھ میچ میں نہیں۔
