پی سی بی کے ملازمین و کوچز پی ایس ایل کے اگلے ایڈیشن میں کام نہیں کرسکیں گے

09 فروری ، 2019

یہ تمام تقرریاں سابق دور میں ہوئی ہیں جس میں نئی انتظامیہ نے کوئی تبدیلی نہیں کی ہے — فوٹو:فائل

پاکستان کرکٹ بورڈ (پی سی بی)کے ملازمین و کوچز پاکستان سپر لیگ (پی ایس ایل) کے پانچویں ایڈیشن میں کام نہیں کرسکیں گے۔

پاکستان سپر لیگ کا چوتھا ایڈیشن 14 فروری سے شروع ہورہا ہے، اس بات کے امکانات موجود ہیں کہ آئندہ سال جب پانچواں ایڈیشن ہوگا تو پاکستان کرکٹ بورڈ سے وابستہ ملازمین اور پاکستان کرکٹ ٹیم کے ساتھ کام کرنے والے کوچز لیگ کیلئے کام نہیں کرسکیں گے۔

پاکستان کرکٹ بورڈ کے گورننگ بورڈ کا اگلا اجلاس 6 اپریل کو رکھا گیا ہے جس میں پی ایس ایل میں کام کرنے والے ملازمین کیلئے پالیسی کو حتمی شکل دی جائے گی، اس وقت پاکستان ٹیم کے ہیڈکوچ مکی آرتھر اور بولنگ کوچ اظہر محمود سمیت کئی ریجنل کوچز مختلف فرنچائزوں کے ساتھ منسلک ہیں۔

ذرائع کا کہنا ہے کہ گزشتہ دنوں ہونے والے گورننگ بورڈ اجلاس میں یہ معاملہ زیر بحث آیا کہ بورڈ کے ملازمین کو کسی بھی فرنچائز کیلئے کام کرنا مفادات کا ٹکراؤ ہے چوںکہ پاکستان سپر لیگ کے شروع ہونے میں اب ایک ہفتے سے کم وقت رہ گیا ہے، اس لیے فرنچائز کیلئے کام کرنے کا معاملہ مؤخر کردیا گیا ہے۔

امکان ہے کہ تین ماہ بعد جب اگلی میٹنگ ہوگی، اس وقت پاکستان سپر لیگ ختم ہوجائے گی اور ورلڈ کپ کے بعد مکی آرتھر سمیت تمام کوچز اور سلیکشن کمیٹی کے معاہدوں کی بھی تجدید ہونا ہے، اس لیے نئی پالیسی بناکر کوچز، سلیکشن کمیٹی سے نئے معاہدوں میں اس پر عمل درآمد کرایا جائے گا۔

اجلاس میں یہ بات شدت سے زیر بحث آئی ہے کہ اگر پاکستان ٹیم اور ریجن کے کوچز ہی فرنچائز کیلئے بھی کام کریں گے تو دیگر بے روزگار کوچز کو کہاں موقع ملے گا؟

ذرائع کا کہنا ہے کہ ورلڈ کپ کے بعد مکی آرتھر معاہدے میں تجدید چاہتے ہیں لیکن فوری طور پر پاکستان کرکٹ بورڈ نے انہیں کوئی یقین دہانی کرانے سے انکار کردیا ہے۔

بیٹنگ کوچ گرانٹ فلاور، بولنگ کوچ اظہر محمود اور فیلڈنگ کوچ گرانٹ بریڈ برن سمیت تمام کوچز اور منیجر طلعت علی ملک کے معاہدے ورلڈکپ کے بعد ختم ہوجائیں گے جس کے بعد امکان ہے کہ بورڈ ورلڈ کپ میں پاکستانی ٹیم کی کارکردگی دیکھ کر معاہدوں کی تجدید کرے گا۔

یہ تمام تقرریاں سابق دور میں ہوئی ہیں جس میں نئی انتظامیہ نے کوئی تبدیلی نہیں کی ہے۔