کراچی: احتساب عدالت نے آغا سراج کے جسمانی ریمانڈ میں تیسری مرتبہ توسیع کردی

کراچی: احتساب عدالت نے اسپیکر سندھ اسمبلی آغا سراج کے جسمانی ریمانڈ میں تیسری مرتبہ توسیع کردی۔

قومی احتساب بیورو (نیب) کے حکام نے پیپلزپارٹی کے رہنما اور اسپیکر سندھ اسمبلی آغا سراج درانی کو کراچی کی احتساب عدالت میں پیش کیا۔

جیونیوز نے نیب کے چھاپے میں آغا سراج کے گھر سے لی گئی چیزوں کی تفصیلات حاصل کرلیں

نیب نے اسپیکر سندھ اسمبلی کی صاحبزادی سے زبردستی دستخط کرانے اور اہلخانہ سے کسی بھی قسم کی بدسلوک کی سختی سے تردید کی ہے۔

دورانِ سماعت آغا سراج درانی نے عدالت میں کہا کہ میری فیملی کو ملزم بنایا جارہا ہے، اس پر عدالت نے اسپیکر سندھ اسمبلی سے مکالمہ کیا کہ اپنے بارے میں بتائیں۔

ملزم نے عدالت کو بتایا کہ مجھے ایک چھوٹے سے کمرے میں رکھا ہوا ہے، نہ وہاں روشنی ہے اور نہ کوئی اخبار ٹی وی، گھر والوں سے نہیں ملنے دیا، میرے باورچی کو پکڑ لیا گیا ہے۔

نیب پراسیکیوٹر نے کہا کہ باورچی کے اکاوئنٹ میں بڑی بڑی ٹرانزیکشن ہوئی ہیں اس لیے پکڑا ہے۔

نیب پراسیکیوٹر نے عدالت کو بتایا کہ ملزم نے پچھلی دفعہ شکایت کی تھی جس پر کمرے میں اے سی لگا دیا ہے، یہ 12 بجے اٹھتے ہیں، ناشتہ کرتے ہیں اور اخبار پڑھتے ہیں۔

نیب پراسیکیوٹر نے عدالت سے استدعا کی کہ ملزم سے مزید تفتیش درکار ہے لہٰذا 15 روز کا جسمانی ریمانڈ دیا جائے۔

عدالت نے نیب کی 15 روز کی استدعا کو مسترد کرتے ہوئے ملزم کا 10 روز کا ریمانڈ دیتے ہوئے جسمانی ریمانڈ میں تیسری مرتبہ توسیع کردی۔

مراد علی شاہ کا نیب اہلکاروں پر آغا سراج کے گھر کی خواتین سے نازیبا سلوک کا الزام

نیب والوں نے آغا سراج درانی کے گھر والوں سے کہا کہ کاغذات پر دستخط کریں ورنہ ہم یہاں سے نہیں جائیں گے: مراد علی شاہ کی پریس کانفرنس

اس سے قبل عدالت ملزم کا 21 فروری، یکم مارچ اور 11 مارچ کو جسمانی ریمانڈ دے چکی ہے۔

واضح رہےکہ نیب نے 20 فروری کو اسپیکر سندھ اسمبلی آغا سراج درانی کو اسلام آباد سے گرفتار کیا ان پر آمدن سے زائد اثاثے بنانے کا الزام ہے۔