'عمران خان سب کو جیل میں ڈال دیں لیکن ملازمتوں، 50 لاکھ گھروں کا وعدہ پورا کریں'

پاکستان مسلم لیگ (ن) کی ترجمان مریم اورنگزیب کا کہنا ہے کہ وزیراعظم عمران خان سب کو جیل میں ڈال دیں لیکن لوگوں کو روٹی، ایک کروڑ نوکریاں اور پچاس لاکھ گھر دینے کا وعدہ پورا کریں۔

ترجمان ن لیگ مریم اورنگزیب نے وزیراعظم کی تقریر پر ردعمل ظاہر کرتے ہوئے کہا کہ عمران خان جنہیں چور کہہ رہے ہیں ان کی حکومت میں مہنگائی 3 فیصد تھی جو اب 10 فیصد ہوگئی ہے۔

زرداری و نواز نے ملک کے ساتھ جو کیا وہ کوئی دشمن بھی نہ کرے: وزیراعظم

چاہے جتنی بھی دیر لگ جائے ان لوگوں کو سزائیں ضرور دلوائيں گے، وزیراعظم کا کوئٹہ میں 'نیا پاکستان ہاؤسنگ اسکیم' منصوبے کے سنگ بنیاد تقریب سے خطاب

انہوں نے کہا کہ 'عمران صاحب کیوں ہر روز ہارے ہوئے شخص جیسی تقریر کرتے ہیں، عمران صاحب آج پھر شہباز شریف کے گھروں کے منصوبے کو بلوچستان تک پہنچانے پر آپ کو مبارکباد'۔

مریم اورنگزیب نے کہا کہ 'عمران صاحب خالی برتن صرف شور مچا سکتا ہے، آپ کی زبان، نااہلی اور نالائقی سے آپ کی حکومت کبھی کھڑی نہیں ہوسکتی، آپ کی حکومت کھڑی کب ہوئی تھی جو کوئی گرائے گا'۔

ترجمان ن لیگ نے کہا کہ 'چور چور، ڈاکو ڈاکو کا چورن نہیں بک رہا، لوگوں کو روٹی، روزگار اور گھر چاہیے، عمران صاحب ڈال دیں سب کو جیلوں میں لیکن لوگوں کو روٹی دیں،50 لاکھ گھر دیں، ایک کروڑ نوکریاں دیں'۔

مریم اورنگزیب نے کہا کہ 'خان صاحب گزشتہ 20 سال سے آپ قوم کو صرف مسائل بتا رہے ہیں، آپ اتنے نالائق ہیں کہ 9 ماہ میں ایک بھی مسئلہ حل تو کیا کوئی حل بتا بھی نہیں سکے،‎ جس کپتان کے پاس کرائے کی ٹیم ہو، کوئی وژن، پالیسی پلاننگ نہ ہو، وہ صرف شور مچا سکتا ہے، ‎تقریر کے شروع میں آپ نے کہا کہ میں بتاؤں گا قرض کیسے ختم ہوگا پھر اس کا ذکر بھی نہیں کیا'۔

انہوں نے کہا کہ ‎گزشتہ 10 ماہ میں آپ کے دور میں جس رفتار اور مقدار میں لوٹ مار ہوئی، ملکی تاریخ میں مثال نہیں ملتی، ‎72 سال میں ملک اتنا نہیں ڈوبا، نقصان نہیں پہنچا جو آپ نے 9 مہینے میں کیا ہے۔

ترجمان ن لیگ نے مزید کہا کہ 'عمران خان صاحب ملکی قرضہ 11000 میگاواٹ بجلی، 1800 کلو میٹر موٹروے پر لگے، صحت و تعلیم کے منصوبے لگانے اور دہشت گردی ختم کرنے میں قرضے صرف ہوئے، آپ حکومت کے صرف 9 مہینوں میں ملکی قرضہ 30 ہزار ارب ہو گیا، آپ جو یومیہ 14 ارب روپے قرضہ لے رہے ہیں وہ کس کی جیب میں جا رہا ہے؟'

مریم اورنگزیب نے کہا کہ 'عمران خان جن کو چور کہہ رہے ہیں اُن کی حکومت میں مہنگائی 3 فیصد تھی، آپ کی حکومت کے 9 ماہ میں مہنگائی 10 فیصد ہوگئی ہے، اُن کی حکومت میں ‎ترقی کی شرح 5.8 فیصد تھی آپ کی حکومت میں کم ہو کر 2.5 فیصد پر آگئی ہے، ‎عمران صاحب آپ کی حکومت میں ساڑھے 400 ارب روپے ٹیکس ریونیو کا خسارہ ہے، ‎گزشتہ 9 ماہ سے نوجوان جس برے حال میں ہیں، اس کی بھی ملکی تاریخ میں مثال نہیں ملتی'۔

ترجمان ن لیگ نے کہا کہ '‎‎9 ماہ میں پاکستان کا قرض بڑھا، ملک غریب ہوا، لیکن عمران صاحب، علیمہ باجی، جہانگیرترین کی دولت اور جائیدادوں میں اضافہ ہوا، ‎یہ کیسا کپتان ہے جو کہتا ہے مخالف ٹیم کی وجہ سے میں میچ ہارگیا ہوں، ‎آپ میچ اس لیے ہار رہے ہیں کہ آپ نالائق ہیں اور دوسری ٹیم آپ سے بہتر اور لائق تھی، ‎آپ کان کھول کر سن لیں کہ آپ کی حکومت اس قابل نہیں کہ اسے گرایا جائے، آپ کی حکومت ہر لحاظ سے گری ہوئی حکومت ہے'۔

مریم اورنگزیب نے کہا کہ '‎عمران خان نے قوم کو نہیں بتایا کہ گھر بننا کب شروع ہوں گے؟ کب مکمل ہوں گے؟ ‎قوم کو خبردار کررہی ہوں کہ گھروں کے نام پر قوم سے تاریخی فراڈ ہونے جارہا ہے، گھروں کے نام پر غریب ایک روپیہ نہ دیں، ‎غریبوں کے پیسوں سے عمران خان، جہانگیر ترین، علیمہ باجی اور انیل مسرت کے گھر بنیں گے'۔

انہوں نے کہا کہ '‎عمران صاحب آپ14 ارب روپے یومیہ اور 1 کھرب روپے کے پشاور میٹرو کے کھڈے کھود کرملک کو لوٹ رہے ہیں، آپ کے 60 کروڑ روپے کے اثاثے اربوں روپے مالیت کے کیسے ہو گئے؟