ان ہاؤس تبدیلی کا کوئی امکان نہیں: قریشی
16 نومبر ، 2019
وزیرخارجہ شاہ محمود قریشی نے کہا ہے کہ انہیں ان ہاؤس تبدیلی کا کوئی امکان دکھائی نہیں دیتا، ان ہاؤس تبدیلی کچھ لوگوں کی خواہش ہے جو پوری نہیں ہوگی۔
ملتان میں گفتگو کرتے ہوئے وزیر خارجہ نے کہا کہ مولانا فضل الرحمن کے پلان بی کو عوام نے پسند نہیں کیا، حکومت نے دھرنے والوں کے لئے سہولتیں پیدا کیں اور کہیں بھی رکاوٹیں کھڑی نہیں کیں۔
سابق وزیراعظم نوازشریف کا نام ایگزٹ کنٹرول لسٹ (ای سی ایل) سے نکالنے کے لیے حکومت کی جانب سے 7 ارب روپے کے ضمانتی بانڈ جمع کرانے کی شرط رکھی گئی تھی لیکن لاہور ہائیکورٹ نے شہباز شریف کی درخواست پر اپنے فیصلے میں نوازشریف کو غیرمشروط طور پر علاج کے لیے 4 ہفتوں کے لیے بیرون ملک جانے کی اجازت دے دی اور حکومت حکم دیا کہ وہ ان کا نام ایگزیٹ کنٹرول لسٹ (ای سی ایل )سے نکالے۔
انہوں نے کہا کہ ہم نے ہمیشہ عدالتی فیصلے کا احترام کیا ہے، نواز شریف کے مقدمے کا ایک قانونی اور ایک انسانی پہلو ہے، حکومت نے نواز شریف کو پاکستان میں موجود تمام طبی سہولتیں مہیا کیں۔
شاہ محمود قریشی نے کہا کہ عدالت نے قانونی، انسانی پہلو کو سامنے رکھتے ہوئے شریف برادران سے بیان حلفی لیا اور یہ کہ نواز شریف نے بھی بیان حلفی دیا کہ وہ بھائی کی بات کو پورا کریں گے۔
