13 دسمبر ، 2019 
ریلوے اسٹیشن پر شیخ رشید پر انڈے برسادیے گئے
13 دسمبر ، 2019
وزیر ریلوے شیخ رشید احمد خصوصی ٹرین کے ذریعے سرگودھا ریلوے اسٹیشن پہنچے تو ایک شخص نے ان پر انڈے برسادیے تاہم خوش قسمتی سے وفاقی وزیر محفوظ رہے۔
ریلوے ٹریک کا معائنہ کرتے ہوئے وفاقی وزیر شیخ رشید احمد سرگودھا ریلوے اسٹیشن پہنچے تو ڈھول کی تھاپ پر ان کا استقبال کیاگیا۔
شیخ رشید بوگی کے دروازے تک پہنچے اور استقبال کے لیے آنے والوں کو ہاتھ ہلایا، انہیں ہاربھی پہنایا گیا لیکن اچانک ایک شہری نے انڈے پھینکنا شروع کردیے اور شیخ رشید کے خلاف نعرے بھی لگائے۔
خوش قسمتی سے شیخ رشید انڈوں سے محفوظ رہے اور تمام انڈے ٹرین کی بوگی پر لگے۔
پولیس اہلکاروں نے انڈے برسانے والے کامران نامی شخص کو فوری طور پر حراست میں لے لیا تاہم بعد ازاں اسے ریلوے حکام کی ہدایت پر چھوڑدیا گیا۔
ریلوے حکام نے شیخ رشید کی آمد پر ناخوشگوار واقعے کی تحقیقات کا حکم دیتے ہوئے غفلت برتنے والے پولیس اہل کاروں کے خلاف کارروائی کا حکم دے دیا ہے۔
دوسری جانب سوشل میڈیا پر چلنے والی ویڈیو میں انڈے پھینکنے والے شخص کا کہنا ہے کہ وہ پیپلز پارٹی کا کارکن ہے اور شیخ رشید کی جانب سے بلاول بھٹو کے خلاف بیانات پر انہیں غصہ تھا۔
