پی ایس ایل کے دوران دوسرا تکنیکی بلنڈر، نو بال چیک کرنے کیلیے غلط ری پلے چلا دیئے گئے

پاکستان سپر لیگ (پی ایس ایل) میں کوئٹہ گلیڈی ایٹرز اور پشاور زلمی کے درمیان میچ میں بین کٹنگ کے آؤٹ پر نو بال چیک کرنے کے لیے اسٹمپ کیمرے کا غلط ری پلے چلا دیا گیا۔

پی ایس ایل میچ کے دوران اس بلنڈر پر سوشل میڈیا پر بھی صارفین نے پی سی بی کو تنقید کا نشانہ بنایا ہے۔

پاکستان سپر لیگ میں کوئٹہ کی ٹیم پشاور کے خلاف پندرہ اوور میں 171 رن کے ہدف کا تعاقب کر رہی تھی، ایسے میں بین کٹنگ فتح کے لیے ایک روشن امید تھے لیکن اننگز کے گیارہویں اوور کی چوتھی گیند پر وہ مڈ وکٹ پر لیونگ اسٹون کے ہاتھ کیچ آؤٹ ہوئے مگر امپائر نے وہاب ریاض کی نوبال چیک کرنے کے لیے ایکشن ری پلے کا سہارا لیا۔

پی ایس ایل کی کوریج کے دوران بڑی تکنیکی خرابی سامنے آ گئی

کوئٹہ گلیڈی ایٹرز کی جانب سے ریویو لینے پر الٹرا ایج اور اسنیکو میٹر نہیں چل سکا جس کی وجہ سے بابر اعظم آؤٹ ہو کر بھی ناٹ آؤٹ قرار پائے۔

اس دوران مختلف اینگلز کو بار بار دیکھ کر فیصلہ کیا گیا کہ وہاب ریاض کی گیند نو بال نہیں تھی لیکن غور کرنے پر معلوم ہوا کہ اسکرین پر چلنے والے ری پلے ہی غلط تھے۔

سائیڈ کیمرے سے جب دیکھا گیا تو یوں لگا کہ شاید نو بال ہو سکتی ہے، شک کو دور کرنے کے لیے اسٹمپ والے کیمرے کا ری پلے دیکھا تو محسوس ہوا کہ شاید بالر کا پیر لائن کے اندر ہے۔ ایسا کیوں لگا؟ کیوں کہ دونوں الگ الگ گیند کے شاٹس تھے۔

جب سائیڈ کیمرے کا ری پلے دیکھا گیا تو وہ وہی تھا جس گیند پر بین کٹنگ آوٹ ہوئے تھے اور محمد نواز نان اسٹرائیکر اینڈ پر تھے لیکن اسٹیمپ کیمرے کے چلائے جانے والے ری پلے پر نان اسٹرائیکر پر بین کٹنگ ہی نظر آئے، اگر شاٹ بھی انہوں نے ہی مارا تو وہ خود نان اسٹرائیکر اینڈ پر کیسے ہو سکتے ہیں؟

پی ایس ایل: پشاور زلمی نے کوئٹہ گلیڈی ایٹرز کو 30 رنز سے شکست دے دی

پشاور زلمی نے کوئٹہ گلیڈی ایٹرز کو جیت کیلئے 171 رنز کا ہدف دیا جو کوئٹہ کو 15 اوورز میں حاصل کرنا تھا تاہم گلیڈی ایٹرز 7 وکٹوں پر 140 رنز تک محدود رہے

دونوں اینگلز میں نان اسٹرائیکر اینڈ پر کھڑے بیٹسمین نے جو بیٹ تھامے تھے ان پر اسٹیکرز بھی مختلف تھے۔

اس کے علاوہ نظر آنے والے کھلاڑیوں میں سے ایک پوری آستین کی قیمص پہنے ہوئے ہے جب کہ دوسرا آدھی آستین کی شرٹ میں ملبوس ہے۔

ایک رائے یہ بھی ہے کہ یہ انسانی غلطی ہو سکتی ہے مگر اس کی ہی بنیاد پر ممکنہ طور پر امپائرز نے اپنا فیصلہ دیا تاہم شاید اس ایک فیصلے نے ہی میچ کا نتیجہ بھی بدل دیا۔