14 جولائی ، 2020 
کورونا ایسے افراد کو زیادہ متاثر نہ کرسکا جو پہلے سے بیمار نہیں تھے، رپورٹ
14 جولائی ، 2020
محکمہ صحت سندھ نے وزیراعلیٰ سندھ مراد علی شاہ کو کورونا صورتحال پر رپورٹ پیش کردی جس کے مطابق پاکستان میں کورونا کا وار دیگر بیماریوں میں مبتلا افراد پر زیادہ چلا۔
رپورٹ کے مطابق کورونا سے انتقال کرنے والے 71 فیصد افراد دیگر بیماریوں میں بھی مبتلا تھے جب کہ کورونا ایسے افراد کو زیادہ متاثر نہ کرسکا جو پہلے سے بیمار نہیں تھے۔
رپورٹ میں بتایا گیا ہے کہ کورونا سے انتقال کرنے والے صرف 29 فیصد افراد کو کوئی اور بیماری نہیں تھی۔
رپورٹ کے مطابق ملک میں مجموعی طور پر 5 ہزار 266 افراد کورونا کے باعث انتقال کرگئے ہیں جن میں سے ایک ہزار 377 افراد کو کوئی اور بیماری نہیں تھی۔
محکمہ صحت کی رپورٹ میں بتایا گیا ہے کہ انتقال کرنے والوں میں 3 ہزار 362 افراد دیگر بیماریوں میں بھی مبتلا تھے۔
خیال رہے کہ ملک میں کورونا کیسز اور اموات میں اضافہ ہورہا ہے اور اب تک 5 ہزار سے زائد افراد جاں بحق ہوچکے ہیں جب کہ متاثرہ مریضوں کی تعداد ڈھائی لاکھ سے تجاوز کرچکی ہے۔
گزشتہ روز بھی پاکستان پیپلزپارٹی کے چیئرمین بلاول بھٹو زرداری نے وفاقی حکومت پر کورونا ٹیسٹنگ کم کرنے کا الزام عائد کیا تھا۔
