29 ستمبر ، 2021 
جائیداد منتقلی کیس: عمر شریف کی اہلیہ سے فلیٹ خریدنے والا شہری عدالت پہنچ گیا
29 ستمبر ، 2021
علاج کے لیے بیرون ملک جانے والے معروف کامیڈین اور اداکار عمر شریف کی اہلیہ سے فلیٹ خریدنے والا شہری عدالت پہنچ گیا۔
عمر شریف کی اہلیہ زرین غزل سے فلیٹ خریدنے والے محمد سلمان نے عدالت سے رجوع کیا ہے اور کیس میں فریق بننے کی درخواست دائرکی ہے۔
درخواست گزارکے مطابق انہوں نے عمر شریف کی اہلیہ زرین غزل سے ساڑھے 4 کروڑ روپے میں فلیٹ خریدا تھا اور عمر شریف کی موجودگی میں ہی فلیٹ کی منتقلی کی کارروائی مکمل کی گئی تھی لیکن اس کے باجود عمرشریف نے عدالت سے رجوع کرلیا اور عدالت کی جانب سے حکم امتناع کے باعث جائیداد منتقلی رک گئی۔
درخواست گزار محمد سلمان نے عدالت سے درخواست کی ہےکہ فلیٹ اس کے حوالےکیا جائے۔
دوسری جانب عمر شریف کے وکیل کا کہنا ہےکہ زرین غزل نے عمرشریف کی جعلی گفٹ ڈیڈ پر فلیٹ فروخت کیا، فلیٹ فروخت کرنے اور جعلی گفٹ ڈیڈ کو عدالت میں چیلنج کر رکھا ہے۔
وکیل عمر شریف کے مطابق بینک سے 2016 میں قرضہ لےکر اپارٹمنٹ خریدا گیا تھا، عمر شریف کی علالت کے دوران دسمبر 2020 میں تیسری بیوی نے اپارٹمنٹ اپنے نام کرالیا۔
عدالت نے زرین غزل کو اپارٹمنٹ بیچنے سے روکنےکے عبوری حکم میں بھی توسیع کردی ہے اور عمرشریف، اہلیہ زرین غزل، سب رجسٹرار اور سندھ حکومت و دیگرکو نوٹس جاری کرتے ہوئے فریقین سے 21 نومبر تک جواب طلب کرلیا ہے۔
