شاداب خان کے لیے چیلنجز کیا ہیں ؟

پاکستان سپر لیگ (پی ایس ایل )  کی فرنچائز اسلام آباد یونائیٹڈ کے کپتان شاداب خان نے کوویڈ 19 کی وجہ سے پیدا ہونے والے حالات کو مشکل قرار دیا ہے۔

پی ایس ایل سے قبل آن لائن پریس کانفرنس میں کپتان شاداب خان نے کہا کہ کھیلوں کی دنیا میں کوویڈ 19 کی وجہ سے حالات اچھے نہیں ہیں کئی مسائل اور چیلنجز کا سامنا کرنا پڑتا ہے۔

شاداب خان کا کہنا تھا کہ  ابھی میں آسٹریلیا سے بگ بیش لیگ کھیل کر واپس لوٹا ہوں, وہاں بھی کوویڈ 19 کی وجہ سے بہت مشکلات سامنا کرنا پڑا کیونکہ وہاں بھی بہت کیسز سامنے آئے تھے لیکن اس کے باوجود بی بی ایل کو مکمل کیا جا رہا ہے اور اس کی وجہ یہ تھی کہ جو پروٹوکولز بنائے گئے تھے اس پر سب عمل کر رہے تھے ۔

 مجھے امید ہے کہ پی ایس ایل بھی اچھے انداز میں ہو گی:شاداب خان

شاداب نے اپنی گفتگو میں امید ظاہر کرتے ہوئے کہا کہ  مجھے امید ہے کہ پی ایس ایل بھی اچھے انداز میں ہو گی  اس حوالے سے پی سی بی نے اچھے انتظامات کیے ہیں ، بس یہ ہے کہ ہم سب کو اپنی ذمہ داریاں پورا کرنی ہیں ۔

شاداب خان نے کہا کہ پی ایس ایل کی فرنچائزز کے کپتانوں سے بڑھ کر ٹیموں کا آپس میں مقابلہ ہو گا جو کہ ہمیشہ ہوتا ہوا آیا ہے ۔ اس مرتبہ بھی اچھا مقابلہ ہو گا  تمام ٹیمیں متوازن ہیں، سب نے اچھی تیاری کی ہو ئی ہے ، اچھی پرفارمنسز دینے کی کوشش کریں گی۔

میں اس مرتبہ بھی اوپر کے نمبروں پر بیٹنگ کروں گا:لیگ اسپنر

لیگ اسپنر کہا کہ میں اس مرتبہ بھی اوپر کے نمبروں پر بیٹنگ کروں گا ، یہ ہماری ٹیم کی پلاننگ کا حصہ ہے ، ہم ڈیٹا پر یقین رکھتے ہیں اور اس کے مطابق مجھے اوپر کے نمبروں پر بیٹنگ کے لیے بھیجا جاتا ہے ، لوگوں کا کیا ہے ، لوگ باتیں کرتے رہتے ہیں اس مرتبہ بھی باتیں کریں گے لیکن میں اوپر کے نمبروں پر بیٹنگ کروں گا ۔

شاداب خان نے کہا کہ فرنچائز کرکٹ میں یہ بھی چیلینجز ہوتے ہیں کہ آپ جن بڑے بڑے کھلاڑیوں کے ساتھ کھیلتے ہیں اور پھر انہی کے خلاف کھیلنا پڑتا ہے  لیکن یہ ضرور ہے کہ جب آپ ان بڑے کھلاڑیوں کو آؤٹ کرتے ہیں تو پھر آپ کے اعتماد میں اضافہ ہوتا ہے۔