18 مارچ ، 2022 
کراچی: شانتی نگر میں جھونپڑیوں میں آتشزدگی سے جاں بحق بچوں کی تعداد 5 ہوگئی
18 مارچ ، 2022
کراچی کے علاقے گلشن اقبال میں شانتی نگر کے قریب کچی آبادی کی جھونپڑیوں میں آتشزدگی سے جھلسنے والی کمسن بچی بھی اسپتال میں چل بسی جس کے بعد اس افسوسناک واقعے میں جاں بحق بچوں کی تعداد 5 ہوگئی ہے جن میں چار بہن بھائی بھی شامل ہیں۔
پولیس کے مطابق جاں بحق اور زخمی ہونے والوں کی عمریں 4 سے 12 سال کے درمیان ہیں، مرنے والوں میں دو بھائی اور دو بہنیں شامل ہیں جن کی شناخت 12 سالہ صائمہ، 11 سالہ فرحان، 9 سالہ کامران اور 8 سالہ طیبہ کے ناموں سے ہوئی ہے جبکہ 4 سالہ زیبا زخمی ہوئی تھی جو بعد ازاں دوران علاج زخموں کی تاب نہ لاتے ہوئے دم توڑ گئی۔
حکام کا کہنا ہے کہ متاثرہ خاندانوں کا تعلق رحیم یار خان سے ہے جن کی میتیں ان کے آبائی علاقے روانہ کی جائیں گی۔
ریسکیو حکام کے مطابق آگ لگنے سے 5 جھونپڑیاں مکمل طور پر جل گئیں اور آگ کے وقت بچے جھونپڑیوں میں تھے جبکہ ان کے والدین کام پر گئے ہوئے تھے۔
فائر بریگیڈ کے 2 ٹینڈرز نے آگ پر قابو پایا، پولیس نے دعویٰ کیا ہے کہ آگ لگنے کا واقعہ شارٹ سرکٹ کے باعث پیش آیا۔
