26 مارچ ، 2022 
مکان پر قبضے کا کیس: سندھ پولیس کے سابق ڈی آئی جی کو تین سال قید کی سزا
26 مارچ ، 2022
کراچی کی مقامی عدالت نے سندھ پولیس کے سابق ڈی آئی جی کو مکان پر قبضے کے کیس میں تین سال قید کی سزا سنادی۔
کراچی کے ضلع شرقی کے ایڈیشنل ڈسٹرکٹ اینڈ سیشن جج نے گلستان جوہر بلاک 7 میں 240 گز کے مکان پر غیر قانونی قبضے سے متعلق شہری رانا محمدندیم کی درخواست پر فیصلہ سنایا۔
درخواست گزار شہری نے مؤقف اختیار کیا تھا کہ گلستان جوہر بلاک نمبر 7 میں 240 گز کا مکان اکتوبر 2016 میں خریدا تھا لیکن کچھ عرصے بعد پولیس اہلکاروں نے ڈی آئی جی سائیں رکھیو کے کہنے پر مکان کے تالے توڑ کر قبضہ کرلیا۔
دورانِ سماعت ملزم کے وکیل نے اپنے دلائل میں کہاکہ سائیں رکھیو میرانی نے مکان پر قبضہ نہیں کیا ان کے خلاف درخواست نا قابل سماعت ہے۔
عدالت نے درخواست پر فریقین کے دلائل سننے کے بعد فیصلہ سناتے ہوئے سابق ڈی آئی جی سائیں رکھیو میرانی کی ضمانت منسوخ کردی اور تین سال قید کی سزا سنائی جب کہ ایک لاکھ روپے جرمانہ بھی عائد کیا۔
عدالت نے اپنے حکم میں کہا کہ ملزم نے جب سے گھر پر قبضہ کیا ہوا تھا اس وقت سے 15 ہزار روپے ماہانہ کے حساب سے کرایہ بھی ادا کرے۔
عدالت نے ایس ایچ او گلستان جوہر کو عدالتی احکامات پر عملدرآمد کا حکم دے دیا اور مکان کا قبضہ درخواست گزار کو دلوانے کی ہدایت کی۔
