کراچی میں تیز بارش، 12 پروازیں منسوخ، فلائٹ آپریشن شدید متاثر

کراچی میں بدھ کو مسلسل تیز  بارش کے باعث جناح انٹرنیشنل ائیرپورٹ سے 12 پروازیں منسوخ کر دی گئیں، اسکردو کی پرواز کو سکھر اتارا گیا جبکہ فلائٹ شیڈول بری طرح متاثر ہوا۔

ایوی ایشن ذرائع کے مطابق پی آئی اے کی کراچی سے لاہور کیلئے پرواز پی کے 306 کو منسوخ کردیا گیا۔  پی آئی اے کی فیصل آباد کیلئے پرواز  پی کے 340 سوا دو گھنٹے کی تاخیر سے رات 11 بجے روانہ ہوگی۔

پی آئی اے کی کراچی سے اسلام آباد کی شام 4 بجے کی پرواز پی کے 308 تاخیر سے رات 8 بجے روانہ ہوئی۔ اسلام آباد سے ائیربلو کی پرواز پی اے 205 کو بارش کی وجہ سے کراچی میں لینڈنگ کیلئے فضا میں 20 منٹ تک انتظار کرایا گیا۔

اسکردو سے کراچی پہنچی پی آئی اے کی پرواز پی کے 456 موسم کی خرابی کی وجہ سے لینڈ نہ کر سکی جسے سکھر منتقل کردیا گیا۔ یہ پرواز موسم ٹھیک ہونے کے بعد سکھر سے ایک گھنٹے بعد واپس کراچی پہنچی۔

فلائی دبئی کی شام 4 بجے کی کراچی سے دبئی کی پرواز  ایف زیڈ 336 سوا گھنٹہ تاخیر سے روانہ ہوئی۔ ائیر سیال کی کراچی سے پشاور کیلئے پروازیں پی ایف 151 منسوخ کر دی گئی۔

کراچی سے پی آئی اے کی لاہور کیلئے پرواز پی کے 304 دو گھنٹے تاخیر سے گئی۔  پی آئی اے کی کراچی سے جدہ، کوئٹہ اور اسلام آباد کی پروازوں کو تاخیر کا سامنا کرنا پڑا۔

پی آئی اے کی کراچی سے بہاولپور کیلئے پرواز  پی کے 588 منسوخ کر دی گئی۔ سیرین ائیر کی پرواز ای آر  524 کراچی سے لاہور کیلئے روانہ نہ ہوسکی۔ لاہور سے کراچی کیلئے پی آئی اے کی پرواز پی کے307 منسوخ کی گئی۔

بہاولپور سے کراچی کیلئے پرواز پی کے 589 منسوخ کردی گئی۔ کراچی سے گوادر اور تربت کی اپ ڈاؤن پروازیں بھی منسوخ کی گئیں۔ پشاور سے کراچی کیلئے ائیر سیال کی پرواز پی ایف 152 منسوخ ہوئی۔

اسلام آباد سے ائیر سیال کی پرواز  پی ایف 122 بھی منسوخ کی گئی۔ کراچی سے ابوظبی، شارجہ، دبئی اور سعودیہ کیلئے بین الاقوامی پروازیں بھی تاخیر کا شکار ہوئیں۔