14 اگست ، 2022 
پولیس کے سینیئر حکام نے یوم آزادی ایدھی ہومز میں یتیم بچوں کے ساتھ منایا
14 اگست ، 2022
سینیئر سپرٹنڈنٹ آف پولیس (ایس ایس پی) ملیر عرفان بہادر نے ڈپٹی کمشنر ملیر اور ایس ایس پی اسپیشل انویسٹیگیشن یونٹ عارف عزیز کے ہمراہ پاکستان کی 75ویں یوم آزادی ایدھی ہومز میں یتیم اور خصوصی بچوں کے ساتھ منائی۔
ایس ایس پی ملیر عرفان بہادر نے فیصل ایدھی کی دعوت پر ایدھی ہومز میں رہائش پذیر بچوں کی جانب سے منعقد تقریب میں شرکت کی۔
بچوں کی جانب سے مختلف ملی نغموں پر ٹیبلو پیش کیے گئے جسے ضلعی سربراہان نے سراہا۔
ایس ایس پی ملیر نے محسن انسانیت عبدالستار ایدھی کی قبر پر فاتحہ خوانی بھی کی اور ان کی انسانیت کیلئے کی گئی خدمات کو خراج عقیدت پیش کیا۔
اس موقع پر ایس ایس پی ملیر بچوں میں گھل مل گئے، بچوں کے ساتھ وقت گزارا اور سیلفیز بھی بنوائیں۔
ایس ایس پی ملیر نے اس موقع پر کہا کہ بچے اس ملک کے معمار ہیں اور آگے چل کر انہی بچوں نے ملک کی باگ دوڑ سنبھالنی ہے۔
