17 اگست ، 2022 
دبئی سے آنے والی خاتون کا 20 لاکھ روپے مالیت کا سامان ایوی ایشن حکام نے لوٹا دیا
17 اگست ، 2022
فیصل آباد ائیر پورٹ پر سول ایوی ایشن اتھارٹی کے عملے نے خاتون مسافر کی ٹیکسی میں گمشدہ 20 لاکھ روپے مالیت کی اشیاء تلاش کرکے انہیں پہنچا کر فرض شناسی کی مثال قائم کر دی۔
پاکستان سول ایوی ایشن کے ترجمان کے مطابق خاتون مسافر علینہ زین دبئی سے فلائی دبئی کی پرواز ایف زیڈ 343 سے فیصل آباد ائیرپورٹ پہنچی تھیں۔
خاتون جلد بازی میں اپنا قیمتی بیگ ائیرپورٹ سے لی گئی ٹیکسی میں بھول کر گھر چلی گئیں ، یہ ٹیکسی خاتون کے خاوند نے بک کرائی تھی۔
سی اے اے منیجر فیصل آباد ائیرپورٹ انور ضیا اور سی اے اے کی آئی ٹی ٹیم نے سی سی ٹی وی فوٹیج بالخصوص سی اے اے کار پارکنگ سسٹم فوٹیج، ایف آئی اے، نادرا اور ایکسائز اینڈ ٹیکسیشن کے اداروں کے تعاون سے ٹیکسی ڈرائیور کا کھوج لگایا اور تمام اشیاء بحفاظت برآمد کرلیں۔
خاتون مسافر کا بیگ سی اے اے عملے نے چیک کیا تو اس میں 4 ہزار 600 امریکی ڈالر، 2 ہزار 600 اماراتی درہم، ایک آئی فون 13 اور قیمتی لیپ ٹاپ موجود تھا۔
بعدازاں مسافر علینہ زین کو فیصل آباد ائیرپورٹ پر ان کی قیمتی اشیاء، غیر ملکی کرنسی اور دیگر سامان ان کےحوالے کردیا گیا۔
خاتون مسافر کے بیگ سے ملنے والی غیر ملکی کرنسی، لیپ ٹاپ اور آئی فون کی مجموعی مالیت 20 لاکھ روپے سے زائد ہے۔
خاتون مسافر نے ایمانداری اور فرض شناسی کی مثال قائم کرنے پر سی اے اے فیصل آباد ائیرپورٹ ٹیم کی خدمات کو بے حد سراہا۔ خاتون مسافر نے ٹیکسی ڈرائیور کیخلاف قانونی چارہ جوئی نہ کرنے کا بھی فیصلہ کیا۔
