21 اگست ، 2022 
پاکستان
خبریں آ رہی ہیں کہ شہباز گل بھوک ہڑتال پر چلے گئے ہیں: فواد چوہدری۔ فوٹو فائل
شہباز گل کا اسپتال میں کچھ بھی کھانے پینے سے انکار
21 اگست ، 2022
عدالت کے حکم پر اسپتال منتقل کیے گئے پاکستان تحریک انصاف کے رہنما شہباز گل نے کچھ بھی کھانے پینے سے انکار کر دیا۔
ذرائع پمز اسپتال کا بتانا ہے کہ شہباز گل گزشتہ رات سےکچھ بھی کھانے سے انکار کر رہے ہیں، شہباز گل کھانے پینے کی کوئی اشیا نہیں لے رہے۔
ذرائع کا کہنا ہے کہ کھانا پینا چھوڑنا بظاہر شہباز گل کا اپنا ذاتی اقدام لگ رہا ہے۔
پاکستان تحریک انصاف کے رہنما فواد چوہدری کا اس حوالے سے کہنا ہے کہ خبریں آ رہی ہیں کہ شہباز گل بھوک ہڑتال پر چلے گئے ہیں۔
یاد رہے کہ دو روز قبل عدالت نے پولیس کی جانب سے شہباز گل کے مزید جسمانی ریمانڈ کی استدعا مسترد کرتے ہوئے انہیں پیر تک پمز اسپتال میں رکھنے اور ان کا دوبارہ میڈیکل کرانے کا حکم دیا تھا۔
