25 اگست ، 2022 
ویڈیو: نارتھ ناظم آباد میں بینک کے باہر فائرنگ سے منیجر جاں بحق
25 اگست ، 2022
کراچی کے علاقے نارتھ ناظم آباد میں نجی بینک کے باہر نامعلوم ملزمان کی فائرنگ سے منیجر جاں بحق ہوگیا۔
پولیس کے مطابق واقعہ نارتھ ناظم آباد بلاک آئی میں خدیجہ مارکیٹ کے قریب پیش آیا۔
پولیس کے مطابق موٹر سائیکل سوار ملزمان نے نجی بینک کے باہر فائرنگ کی جس سے بینک کا منیجر 60 سالہ ماکب علی شدید زخمی ہوا۔
شارع نور جہاں پولیس کے مطابق زخمیوں کو فوری طور پر ایمبولینس کے ذریعے عباسی شہید اسپتال منتقل کیا گیا۔
اسپتال ذرائع کے مطابق ماکب اسپتال پہنچائے جانےکے دوران دم توڑ چکا تھا۔
واقعےکی اطلاع ملتے ہی سینیئر سپرنٹنڈنٹ پولیس سینٹرل معروف عثمان فوری طور پر موقع پر پہنچے، پولیس کے مطابق واقعےکی تحقیقات کی جا رہی ہیں۔
ایس ایس پی سینٹرل عثمان معروف کا کہنا ہے کہ قتل کی واردات ذاتی دشمنی کا شاخسانہ معلوم ہوتی ہے۔ مقتول منیجر بینک کے دروازے پر سگریٹ پی رہا تھا، موٹر سائیکل سوار 2 ملزمان میں سے ایک ملزم نے پہلے گیٹ پر موجود گارڈ کو اسلحہ دکھا کر سے ڈرایا اور وہ گارڈ اسلحہ سمیت اندر بھاگ گیا۔
ملزم نے منیجر کا پیچھا کرکے عقب سے تین گولیاں ماریں۔ ایس ایس پی سینٹرل کے مطابق واقعے کی چھان بین کی جارہی ہے۔
