30 اکتوبر ، 2022 
کراچی: ٹریفک جام میں شہریوں کو لوٹنے والے 8 رکنی گروہ کے 4 ملزم گرفتار
30 اکتوبر ، 2022
کراچی کے ضلع سینٹرل کی سر سید ٹاؤن پولیس نے خفیہ اطلاع پر کارروائی کے دوران اسٹریٹ کرائم میں ملوث گروہ کے 4 ملزمان کو گرفتار کرلیا۔
پولیس ترجمان کے مطابق گرفتار ملزمان میں نوید، ساگر عباسی، آصف اور رضا عباس شامل ہیں جن کے قبضے سے 10 موبائل فون، 4 پستول 8 راؤنڈ، پرس اور موٹر سائیکل برآمد ہوئی۔
ترجمان کے مطابق ملزمان قیوم آباد اور سرجانی ٹاؤن کے رہائشی ہیں اور قیوم آباد سے سرجانی کے روٹ پر ہی واردات کرتے ہیں۔
ملزمان نے انکشاف کیا کہ بلوچ کالونی پُل، حسن اسکوائر، لیاقت آباد اور ناگن چورنگی برِجز پر ٹریفک جام کے دوران شہریوں کو لوٹتے اور فرار ہو جاتے ہیں، ملزمان کا 8 رکنی گروہ ہے جن کا تعلق جنوبی پنجاب سے ہے۔
پولیس کے مطابق ملزمان نے انکشاف کیا کہ چار چار موٹر سائیکل پر 8 ملزمان مسلح سوار ہوکر چائے کے ہوٹلوں پر بیٹھے ہوئے شہریوں کو بھی لوٹتے تھے۔
پولیس کا کہنا ہے کہ ملزمان کے دیگر ساتھیوں کی گرفتاری کے لیے چھاپہ مار کارروائی جاری ہے اور جلد گرفتار کر لیا جائے گا۔
پولیس نے مزید بتایا کہ ملزمان کا سرسید پولیس سے ایک ہفتہ قبل بھی مڈبھیڑ ہوا تھا، جس پر ملزمان پولیس پر فائرنگ کرتے ہوئے فرار ہونے میں کامیاب ہوگئے تھے۔
پولیس کے مطابق گرفتار ملزمان کے خلاف مقدمات درج کرکے تفتیش کا آغاز کردیا گیا ہے۔
