پاک بھارت ٹیسٹ سیریز ہوگی یا نہیں؟ بی سی سی آئی عہدیدار کا بیان سامنے آگیا

بورڈ آف کنٹرول فار کرکٹ اِن انڈیا (بی سی سی آئی) کے سینئر عہدیدار نے پاک پاک بھارت باہمی سیریز کو سفارتی تعلقات میں بہتری سے مشروط قرار دے دیا۔

گزشتہ روز سابق آسٹریلوی کرکٹر سائمن او ڈانل نے دعویٰ کیا تھا کہ پاکستان اور بھارت آسٹریلیا میں ٹیسٹ میچ کھیلنے کے لیے بات چیت کر رہے ہیں۔

تاہم اب بھارتی میڈیا سے گفتگو کرتے ہوئے بی سی سی آئی کے ایک سینئر عہدیدار نے اس امکان کو مسترد کردیا اور کہا کہ جب تک حکومت کی جانب سے منظوری نہیں دی جاتی تب تک پاک بھارت میچز صرف  آئی سی سی ایونٹس اور ایشیا کپ تک ہی محدود رہیں گے۔

آسٹریلیا میں پاک بھارت ٹیسٹ کیلئے بات ہو رہی ہے، سابق آسٹریلوی کرکٹر کا دعویٰ

یہ بھی ممکن ہےکہ پاکستان بھارت اور آسٹریلیا کے درمیان تین ملکی سیریز ہو، یہ بھی ممکن ہےکہ صرف پاکستان اور بھارت کے درمیان ٹیسٹ میچ ہو، سائمن او ڈانل

بی سی سی آئی عہدیدار نے بتایا کہ 'اس وقت اس حوالے سے کوئی بات چیت نہیں ہورہی، پاکستان کرکٹ بورڈ کے چیئرمین رمیز راجا نے دبئی میں اے سی سی کے اجلاس کے دوران سہ ملکی سیریز کی تجویز دی تھی لیکن ہماری حکومت نے اس پر کسی قسم کی رضامندی ظاہر نہیں کی'۔

انہوں نے دو ٹوک انداز میں کہا کہ 'فی الحال جب تک دونوں ممالک میں سفارتی تعلقات بہتر نہیں ہوتے تب آئی سی سی ایونٹس کے علاوہ کوئی ٹیسٹ یا سہ فریقی سیریز نہیں ہوگی'۔

اس کے علاوہ ذرائع پی سی بی کا کہنا ہےکہ پاک بھارت ٹیسٹ سیریز سے متعلق آسٹریلیا میں بات چیت کے ہونےکا علم نہیں ہے، ایسی خبر کوئی بھی دے سکتا ہے لیکن ایسا کوئی پلان نہیں، فیوچر ٹور پروگرام میں تو ایسی کوئی گنجائش بھی نہیں رکھی گئی، آنے والے دنوں کے شیڈول کا اعلان بھی ہو چکا ہے۔

یاد رہے کہ ٹی ٹوئنٹی ورلڈکپ میں  23 اکتوبر کو پاک بھارت میچ ہوا جس میں  بھارت نے سنسنی خیز مقابلے کے بعد پاکستان کو 4 وکٹوں سے شکست دی تھی۔