01 اپریل ، 2023 
جناح ٹرمینل سے غائب 20 لاکھ روپے کے زیورات ائیر پورٹ پولیس نے ڈھونڈ نکالے
01 اپریل ، 2023
کراچی کے جناح انٹرنیشنل ائیرپورٹ پر دبئی سے پہنچے مسافر کے 20 لاکھ روپے مالیت کے 20 دن سے گمشدہ زیورات ائیرپورٹ پولیس نے 2 دن میں کھوج لگا کر ڈھونڈ لیے اور مالک کے حوالے کر دیے۔
ایس ایچ او ائیرپورٹ انسپکٹر کلیم موسیٰ کے مطابق ملائیشیا سے تعلق رکھنے والے ایک مسافر محمد اسلم اپنی اہلیہ کے ہمراہ دبئی کے راستے پرواز ای کے 602 سے 10 مارچ کو کراچی پہنچے۔
لگیج بیلٹ سے سامان لینے کے دوران پورٹر نے ان کا زیورات سے بھرا بیگ غلطی سے کسی دوسرے مسافر کے سامان کی ٹرالی میں رکھ دیا۔
کچھ دیر بعد بیگ غائب ہونے کا احساس ہونے پر مسافر نے سامان کی تلاش شروع کر دی مگر ناکام رہا۔
ائیر لائن کوارٹر سول ایوی ایشن اور دیگر اداروں سے بھی مدد لی گئی مگر بیگ لے جانے والے مسافر کا پتہ نہ چل سکا۔
کلیم موسیٰ کے مطابق مسافر محمد اسلم نے 28 مارچ کو ائیرپورٹ تھانے میں سامان کی گمشدگی کی رپورٹ درج کرائی۔
پولیس کے مطابق ٹیکنیکل طریقے سے تلاش کے بعد ائیر پورٹ پولیس نے ناصرف بیگ لے جانے والے مسافر کی کھوج لگائی بلکہ کے محمد اسلم کا تمام سامان برآمد کرلیا اور محمد اسلم کو یہ سامان تھانے بلوا کر حوالے کردیا۔
