07 جون ، 2023 
کراچی کے علاقےگڈاپ میں ببرشیرکی موجودگی کی اطلاع پر وائلڈلائف کا سرچ آپریشن
07 جون ، 2023
کراچی کے علاقے گڈاپ میں ببر شیر کی موجودگی کی اطلاع پر محکمہ وائلڈ لائف نے سرچ آپریشن کیا ہے۔
گڈاپ ٹاؤن کے علاقے میں تھڈو ڈیم کے اطراف ببر شیر کی موجودگی کے حوالے سے ویڈیو سوشل میڈیا پر وائرل ہوئی تھی جس کے باعث شہروں میں خوف اور اضطراب پھیل گیا۔
ان اطلاعات پر گذشتہ رات گئے مضافاتی علاقوں میں خصوصی ٹیمیں روانہ کی گئیں، سرچ ٹیمیں بیک وقت گاڑیوں اور موٹرسائیکلوں پر مشتمل اور درکار آلات سے لیس تھیں، تاہم اس تگ و دو کے دوران ببر شیر ہاتھ آیا اور نہ ہی اس علاقے میں اس کی موجودگی کے کوئی شواہد ملے۔
سندھ وائلڈلائف کے کنزرویٹر جاوید مہر کا کہنا ہےکہ ویڈیو میں دکھائی دینے والی نسل کا شیر سندھ میں نہیں ہے۔
حکام کے مطابق کسی فارم ہاؤس سے بھی شیر کے فرار کا واقعہ رپورٹ نہیں ہوا، اگر کوئی شیر کسی فارم ہاؤس سے بھاگا ہوتا تو کتے اس کو بھانپ لیتے۔
ماہرین کا کہنا ہےکہ عموماً جنگلی حیات کی موجودگی کا پتہ کتے اپنی حس کے سبب آسانی لگالیتے ہیں۔
جاوید مہر کے مطابق متعین کردہ ٹیموں نے رات کی تاریکی اور دن کے اجالے میں انتہائی باریک بینی سے تمام علاقوں کا جائزہ لیا اور مقامی افراد کے انٹرویو بھی ریکارڈ کیے۔
خیال رہےکہ گذشتہ 3 روز سے شیر دکھائی دینے کی افواہیں سوشل میڈیا پر سرگرم تھیں، سوشل میڈیا پر سرگرم ایک شخص کی جانب سے بے سروپا افواہیں پھیلانے کے ثبوت بھی ملے ہیں، ویڈیو سے یہ بات بھی واضح ہوئی ہے کہ اس پر ڈبنگ یا وائس اوور کی گئی ہے۔
