14 اگست ، 2023 
جشن آزادی: یو اے ای قونصل جنرل کا پاکستان سے محبت کا خوبصورت انداز
14 اگست ، 2023
متحدہ عرب امارات کے کراچی میں تعینات قونصل جنرل بخیت عتیق الرومیتی نے پاکستان کے یوم آزادی کے موقع پر پاکستان سے محبت کا منفرد انداز اپنایا۔
یواے ای قونصلیٹ کراچی میں جشن آزادی کی تین روزہ تقریبات میں پاکستانی ثقافت کے تمام رنگ بکھیر دیے، تقریبات میں بخیت عتیق الرومیتی کی پاکستان سے محبت قوت گویائی اور سماعت سے محروم خصوصی بچوں کے ہمراہ قومی ترانہ پیش کرتے ہوئے ملّی نغموں پر والہانہ جھومتے رہے جبکہ معصوم بچوں نے تمام صوبوں کی ثقافت کے ذریعے قوم کو اتحاد ایمان تنظیم اور یقین محکم کا پیغام دیا۔
پاک یو اے ای دوستی کی عظیم مثال پیش کرتے ہوئے یو اے ای قونصلیٹ اور ویزا سینٹر کو پاکستانی پرچموں، غباروں اور برقی قمقموں سے دلہن کی طرح سجایا گیا۔ قونصل جنرل نے تقریبات میں شریک بچوں، سفارتکاروں اور شہریوں میں چوڑیاں، پاکستانی پرچم، بیجز اور اعزازی شیلڈ بھی تقسیم کیں۔
یو اے ای قونصل جنرل کراچی بخیت عتیق الرومیتی اور قونصل خانے کے اعلیٰ عہدیداروں نے پوری پاکستانی قوم کو جشن آزادی پر دلی مبارکباد کے پیغامات بھی دیے۔
