آئی پی سی کے خط کے بعد پی سی بی میں تبدیلیوں کی بازگشت

پاکستان کرکٹ بورڈ (پی سی بی) مینجمنٹ کمیٹی کے سربراہ ذکا اشرف سری لنکا سے وطن واپس پہنچ گئے تاہم بدھ کو پی سی بی کے دفتر نہیں آئے۔

 وزارت بین الصوبائی رابطہ (آئی پی سی) کے وزیر اعظم کو خط کے بعد ان کی ممکنہ تبدیلی کی خبریں گرم ہیں۔

پی سی بی مینجمنٹ کمیٹی کے سربراہ ذکا اشرف لنکا پریمیئر لیگ کا فائنل دیکھنے سری لنکا گئے تھےجہاں انہوں نے قومی کرکٹرز سے ملاقات بھی کی تاہم ذکا اشرف سری لنکا سے وطن لوٹ آئے ہیں لیکن بدھ کو پی سی بی آفس نہیں آئے۔

ورلڈکپ سے ڈیڑھ ماہ قبل ایک بار پھر پی سی بی میں تبدیلی کے بادل منڈلانے لگے

وزارت بین الصوبائی رابطہ نے پی سی بی کی منیجمنٹ کمیٹی کے چیئرمین ذکا اشرف کے مستقبل پر فیصلے کیلئے وزیر اعظم ہاؤس کو خط لکھ دیا

واضح رہے کہ وزارت بین الصوبائی رابطہ نے الیکشن کمیشن آف پاکستان (ای سی پی) کی جانب سے سیاسی بنیاد پر تعینات عہدیداروں کی برطرفی کے احکامات کے بعد وزیر اعظم ہاؤس کو لکھے گئے خط کے بعد پی سی بی میں ممکنہ تبدیلیوں کی بازگشت ہے۔

گزشتہ روز آئی پی سی منسٹری کا خط منظر عام پر آنے کے بعد ذکا اشرف کا پاکستان پیپلز پارٹی (پی پی پی) کی سینٹرل ایگزیکٹو کمیٹی سے مبینہ استعفیٰ بھی سامنے آیا ہے جس پر 19 جون کی تاریخ درج ہے۔

یاد رہے کہ ذکا اشرف کو سبکدوش ہونے والے وزیر اعظم نے 20 جون کو بطور پیٹرن نمائندہ پی سی بی کے بی او جی میں نامزد کیا تھا۔