کھیل

ورلڈ کپ کی تیاری 4 سال پہلے شروع ہونا چاہیے، ہم نے6 ماہ پہلےکی: ہیڈ کوچ پاکستان ٹیم

30 اکتوبر ، 2023

آئی سی سی رینکنگ سے فرق نہیں پڑتا کیوں کہ ہم بھارت اور ٹاپ ٹیموں سے نہیں کھیلتے : ہیڈ کوچ گرانٹ بریڈ برن کی پریس کانفرنس/ فائل فوٹو

قومی کرکٹ ٹیم کے ہیڈ کوچ گرانٹ بریڈ برن نے آئی سی سی ورلڈکپ میں پاکستان کی بری پرفارمنس کا ذمہ دار کم وقت میں کی جانے والی تیاری کو قرار دیا ہے۔

کلکتہ میں قومی ٹیم کے ہیڈ کوچ گرانٹ بریڈ برن نے پریس کانفرنس کرتے ہوئے کہا کہ ہم اس صورتحال میں ہیں جہاں ہم ہونا نہیں چاہتے تھے، ہمارا جس پر کنٹرول ہے وہ کریں گے، خواہش تھی کہ یہاں ایسی پوزیشن میں ہوں کہ کنٹرول میں ہوتے۔

انہوں نےکہا کہ ٹورنامنٹ میں 10 ٹیمیں ہیں، آئی سی سی رینکنگ سے فرق نہیں پڑتا کیوں کہ ہم بھارت اور ٹاپ ٹیموں سے نہیں کھیلتے، ہمیں کوالٹی کرکٹ کھیلنا ہوگی لیکن 4 شکستیں ہمارے ٹیلنٹ کی عکاس نہیں، ہم سب ایسی کارکردگی دینا چاہتے ہیں کہ قوم کو ہم پر فخر ہو، ہم نے اب تک اچھی کرکٹ نہیں کھیلی، فینز سے پہلے ہم اپنی ہی توقعات پر ہی پورا نہیں اترے۔

یہاں کی کنڈیشن میں گیند زیادہ سوئنگ نہیں ہورہی جو ہمارے لیے اہم تھا : ہیڈ کوچ

جنوبی افریقا سے شکست پر بات کرتے ہوئے ہیڈ کوچ نے کہا کہ جنوبی افریقا کے خلاف میچ ہارنے کے بعد کھلاڑی کافی افسردہ تھے،اگر اس میچ میں 300 رنز کرتے تو پاکستان جیت جاتا، یہ درست نہیں کہ بھارت سےشکست کے بعد ہمارا اعتماد ختم ہوگیا تھا، یہاں کی کنڈیشن میں گیند زیادہ سوئنگ نہیں ہورہی جو ہمارے لیے اہم تھا۔

گرانٹ بریڈ برن کا مزید کہنا تھا کہ ورلڈکپ کی تیاری 4 سال پہلے شروع ہونا چاہیے تھی، ہم نے 6 ماہ پہلے شروع کی، ان کنڈیشنز پر ہمارے پلیئرز پہلے نہیں کھیلے تاہم ہمیں بنگلا دیش کے خلاف اچھی کرکٹ کھیلنا ہوگی، بطور حریف بنگلا دیش کی صلاحیتوں کا احترام کرتے ہیں۔