پشاور…خیبر ایجنسی کی تحصیل باڑہ میں گزشتہ رات قتل ہونے والے 18 افراد میں سے 10 افراد کے لواحقین کا پشاور میں گورنر ہاوٴس کے سامنے لاشیں رکھ کر کئی گھنٹوں سے دھرنا جاری ہے، پولیس نے دھرنے کے شرکاکومنتشرکرنے کیلئے آنسوگیس کی شیلنگ کردی جس کے باعث میتوں کے ہمراہ دھرنادینے والے افرادمیں بھگدڑ مچ گئی، تاہم آنسو گیس کی شیلنگ سے شرکا منتشر ہوگئے۔ دوسری جانب میتوں کواٹھانے کیلئے ٹرک گورنرہاوٴس کے باہرپہنچادیے گئے، جن کے ذریعے میتوں کو مردہ خانے منتقل کردیا گیا ہے۔ خیبر ایجنسی کی تحصیل باڑہ کے علاقے عالم گودر میں گزشتہ شام نامعلوم افراد نے گھروں میں داخل ہوکر اندھا دھند فائرنگ کردی تھی، جس کے نتیجے میں 18 افراد ہلاک ہوگئے تھے، جبکہ نامعلوم افراد نے لاشوں کو گھروں سے نکال کر کھیتوں میں پھینک دی تھیں، باڑہ میں کرفیو کے باعث لواحقین رات بھر لاشوں کو نہ اٹھاسکے۔ صبح دس لاشوں کو اٹھاکر لواحقین پشاور لے گئے جہاں وہ گورنر ہاوٴس کے سامنے لاشیں رکھ کر احتجاج کررہے ہیں۔ ہلاک ہونے والوں میں ایک ہی خاندان کے سات افراد بھی شامل ہیں۔ باڑہ میں 2008 سے کرفیو نافذ ہے اور شدت پسندوں کے خلاف آپریشن جاری ہے۔