کرکٹ کو اوپر لیکر جانا ہے تو رضوان کو کپتان بنانے کا یہ بہترین وقت ہے: باسط علی

پاکستان کرکٹ ٹیم کے سابق کرکٹر باسط علی نے وکٹ کیپر  بیٹسمین محمد رضوان کو پاکستان ٹیم کا کپتان بنانے کا مشورہ دے دیا۔

باسط علی کامران اکمل کے ہمراہ  نجی ٹی وی شو کے مہمان بنے، جس دوران   میزبان نے کامران اکمل سمیت دیگر مہمانوں سے پی ایس ایل 9 کے دوران بہترین کپتانوں سے متعلق سوال کیا، جس کے جواب میں کامران  اکمل نے کہا کہ اگر دیکھا جائے تو پچھلے چند سالوں سے رضوان اچھی کپتانی کر رہا ہے، رضوان کی ٹیم کئی فائنل کھیل چکی ہے، جس میں ایک میں وہ  ہارا تو دوسرے میں جیتا ہے، اس بار بھی رضوان کی ٹیم ٹاپ پر ہے۔

انھوں نے کہا کہ رضوان کی ٹیم میں اہم بولر کی انجری کے بعد لگ نہیں رہا تھا کہ ان کا بولنگ یونٹ اچھا ہوگا لیکن رضوان نے اپنے بولرز کو بہت اچھے طریقے سے استعمال کیا، کوئٹہ کی ٹیم کے رائیلی روسو بھی اپنی ٹیم کو بہت اچھے سے لے کر چل رہے ہیں اور اچھی کپتانی کر رہے ہیں۔

راشد خان کی غیر موجودگی میں شاہین کی کپتانی بے نقاب ہورہی ہے: اظہر علی

اب اندازہ ہورہا ہے کہ راشد خان مڈل اوورز میں رنز روک کر باقی بولرز کیلئے آسانیاں پیداکرتا تھا لیکن وہ اب نہیں ہے: سابق کپتان

میزبان کے سوال کے جواب پر باسط علی نے کہا کہ میرے خیال میں اگر پاکستانی کرکٹ کو اوپر لے کر جانا ہے تو یہی وہ  بہترین وقت ہے کہ رضوان کو قومی ٹیم کا کپتان بنا دیا جائے، اگر لاہور قلندرز اور اسلام آباد یونائیٹڈ جیسی کرکٹ کھیلنا چاہتے ہیں تو پھر چاہے کسی کو بھی کپتان بنا دیں۔

ایک بار پھر کپتان کی تبدیلی پر باسط علی نے کہاکہ   آپ نے بابر کو ہٹا کر ابھی ایک سیریز ہی کھیلی ہے، کرکٹ میں  آپ کو بڑے فیصلے کرنے پڑیں گے، شاہین کی پیس میں کمی آئی ہے، اگر شاہین سے ورلڈکپ میں پرفام نہیں ہوا تو آپ انھیں تب بھی کپتانی سے ہٹائیں گے لہٰذا  میرا نئے چیئرمین کو مفت مشورہ ہے انہیں چاہیے اہم فیصلہ کرتے ہوئے رضوان کو کپتان بنا دیں۔

تاہم کامران  اکمل نے باسط علی کے مشورے کی مخالفت کرتے ہوئے کہا کہ میرا خیال ہے کہ ہمیں کپتان اتنی جلدی نہیں بدلنا چاہیے، کوئی بھی عہدہ کسی بھی شخص کو دیا جاتا ہے تو اس کو کچھ وقت دینا ضروری ہے، جس پر باسط علی نے لقمہ دیا کہ اس طرح کو حفیظ کو بھی وقت ملنا چاہیے تھا۔