کاروبار

ایف بی آر کی ازسر نو ڈھانچہ سازی کیلئے عمل درآمد کمیٹی تشکیل

20 مارچ ، 2024

کمیٹی جو ٹیکنالوجیکل اور منظم ٹائم فریم میں انتظامی تبدیلی کے ساتھ ’’ایف بی آر کی منظور شدہ تنظیم نو‘‘ پر ہونے والی پیشرفت کی باقاعدگی سے نگرانی بھی کرے گی۔ فوٹو فائل

اسلام آباد: وزیر اعظم شہباز شریف نے ایف بی آر میں اصلاحات کیلئے وزیر خزانہ محمد اورنگزیب کی سربراہی میں سابق نگران وزیر خزانہ ڈاکٹر شمشاد اختر اور دیگر پر مشتمل ایک عملدرآمد کمیٹی تشکیل دے دی ہے۔

وزیر اعظم آفس کی طرف سے جاری کردہ ہدایت کے مطابق وزیر اعظم نے ایف بی آر میں اصلاحات کے نفاذ کی نگرانی کیلئے فوری طور پر عمل درآمد کمیٹی تشکیل دیدی ہے جو ٹیکنالوجیکل اور منظم ٹائم فریم میں انتظامی تبدیلی کے ساتھ ’’ایف بی آر کی منظور شدہ تنظیم نو‘‘ پر ہونے والی پیشرفت کی باقاعدگی سے نگرانی بھی کرے گی۔

یاد رہے کہ الیکشن کمیشن آف پاکستان نے گزشتہ نگران حکومت کے دور میں ایف بی آر کی تنظیم نو کے منصوبے پر عمل درآمد روکنے کی ہدایت کی تھی۔ اس کے بعد یہ معاملہ متعلقہ افسر کی جانب سے دائر درخواست پر اسلام آباد ہائیکورٹ میں پہنچا جس کے بعد عدالت نے اس مشاہدے کے ساتھ کیس واپس لینے کی اجازت دے دی کہ اگر ایسا فیصلہ کیا گیا جس سے ان کی سروس کی شرائط و ضوابط پر منفی اثر پڑے تو وہ اپنی شکایت موزوں فورم پر پیش کریں گے۔

یہ بھی پڑھیں

اب عملدرآمد کمیٹی کی سربراہی وزیر خزانہ محمد اورنگزیب کریں گے جبکہ دیگر ارکان میں ڈاکٹر شمشاد اختر، پاکستان بزنس کونسل کے چیف ایگزیکٹو افسر احسان ملک، کار انداز کے چیف ایگزیکٹو افسر وقاص الحسن، ٹیکس کنسلٹنٹ اکرام الحق، نوید اندرابی، آصف پیر، ڈاکٹر منظور احمد اور سیکرٹری ریونیو ڈویژن شامل ہیں۔