20 مئی ، 2024 
اسحاق ڈار کی بطور ڈپٹی وزیر اعظم تعیناتی کیخلاف درخواست سماعت کیلئے مقرر
20 مئی ، 2024
پاکستان تحریک انصاف کے رہنما شیر افضل مروت کی اسحاق ڈارکی بطور ڈپٹی وزیراعظم تعیناتی کیخلاف درخواست اسلام آباد ہائی کورٹ میں سماعت کیلئے مقرر ہوگئی۔
اسلام آباد ہائیکورٹ کے چیف جسٹس کل شیر افضل مروت کی درخواست پر سماعت کریں گے۔
شیرافضل مروت نے وکیل ریاض حنیف راہی کے ذریعے اسلام آباد ہائی کورٹ میں درخواست دائر کی تھی۔
درخواست میں وفاقی حکومت، سیکرٹری کابینہ ڈویژن، وزیر اعظم اور اسحاق ڈار کو فریق بنایا گیا ہے۔
درخواست میں کہا گیا کہ اسحاق ڈار پہلے ہی بطور وزیر خارجہ کام کر رہے ہیں،وزیراعظم کی منظوری سے اسحاق ڈارکی بطور ڈپٹی وزیراعظم تعیناتی کا نوٹیفکیشن جاری کیا گیا، ڈپٹی وزیراعظم کے عہدے سے آئین پاکستان نا واقف ہے۔
درخواست میں مؤقف اختیار کیا گیا کہ آئین میں ایسی کوئی شق نہیں جو کابینہ ڈویژن کو ڈپٹی وزیراعظم کی تعیناتی کا نوٹیفکیشن جاری کرنے کی اجازت دے، عوام کے خرچ پر ایک ہی شخص کو دو عہدے ذاتی مفاد کیلئے عطا کیے گئے۔
درخواست میں کہا گیا کہ ایک شخص جو غیرقانونی طریقے سے تعینات ہو ریاست کی مراعات حاصل نہیں کرسکتا، اسحاق ڈار کی بطور ڈپٹی وزیراعظم تعیناتی کا 28 اپریل 2024 کا نوٹیفکیشن کالعدم قرار دیا جائے۔
درخواست میں استدعا کی گئی کہ درخواست گزار کو یہ اہم معاملہ عدالت کے سامنے رکھنے پر معاوضہ دیا جائے۔
