لوگوں کو اسمارٹ ڈیوائسز کی لت سے بچانے والا کریڈٹ کارڈ جتنا بڑا اینٹی اسمارٹ فون

کیا آپ ایسا موبائل فون استعمال کرنا پسند کریں گے جس کا سائز ایک کریڈٹ کارڈ سے کچھ بڑا ہو؟

اگر ہاں تو لائٹ 3 نامی ڈیوائس آپ کو ضرور پسند آئے گی مگر ایک مسئلہ ہے کہ یہ اینٹی اسمارٹ فون ہے۔

جی ہاں اس فون کا مقصد ہی یہ ہے کہ آپ اسے کم از کم استعمال کریں۔

اسے ایک امریکی کمپنی نے ایسے افراد کے لیے تیار کیا ہے جو اسمارٹ فونز کے حد سے زیادہ استعمال سے پریشان رہتے ہیں اور ان سے کچھ دور رہنا چاہتے ہیں۔

کمپنی کے مطابق ہمارے صارفین کو حقیقی زندگی میں زیادہ وقت گزارنے کا موقع ملتا ہے۔

لائٹ فون 3 اس کمپنی کا تیسرا فون ہے جو جنوری 2025 تک دستیاب ہوگا۔

کمپنی نے اسے 'ڈمب فون' قرار دیتے ہوئے بتایا کہ اس سے آپ کالز اور ایس ایم ایس تو بھیج سکتے ہیں مگر اس میں ایپس، سوشل میڈیا، ای میل اور انٹرنیٹ براؤزر موجود نہیں۔

اس سے پہلے یہ کمپنی اپنے فونز میں ای انک ڈسپلے استعمال کر رہی تھی مگر اب او ایل ای ڈی اسکرین کو ڈیوائس کا حصہ بنایا گیا ہے۔

پہلی بار اس کمپنی کے کسی فون میں فرنٹ اور بیک پر کیمرے بھی دیے گئے ہیں جن کے لیے شٹر بٹن بھی ڈیوائس میں موجود ہیں جس کے باعث وہ کسی اسمارٹ فون کی بجائے پرانے کیمرے کا حصہ محسوس ہوتے ہیں۔

چارجنگ کے لیے یو ایس بی سی پورٹ، فلیش لائٹ، فنگرپرنٹ سنسر اور 5 جی سپورٹ جیسے فیچرز بھی فون کا حصہ ہیں۔