26 جولائی ، 2024 
پیرس اولمپکس کا باقاعدہ آغاز: پاکستانی ایتھلیٹس کل سے ایکشن میں نظر آئیں گے
26 جولائی ، 2024
دنیائے کھیل کا سب سے بڑا میلہ پیرس اولمپکس کا باقاعدہ آغاز ہوگیا ہے۔
پیرس میں رنگا رنگ افتتاحی تقریب آج دریا سین پر منعقد کی جارہی ہے، تقریب میں خوبصورت مناظر کے ساتھ دل کو چھولینے والی میوزک کی جھنکار بھی ہوگی جبکہ 3 ہزار کے لگ بھگ فنکار پرفارم کریں گے ۔
پیرس اولمپکس میں پاکستانی ایتھلیٹس کا سفر کل سے شروع ہوگا۔ پاکستان کے 2 ایتھلیٹس شوٹنگ کے مقابلوں میں ایکشن میں ہوں گے۔
دن ڈیڑھ بجے شوٹر گلفام جوزف 10 میٹر ائیرپسٹل کے ابتدائی راؤنڈ میں شریک ہوں گے۔مردوں کے 10 میٹر ائیر پسٹل مقابلوں میں گلفام سمیت 33 شوٹرز شرکت کریں گے۔
ابتدائی راؤنڈ میں پلیئرز 10، 10 نشانوں کی 6 سیریز میں حصہ لیں گے۔ ابتدائی 6 سیریز کے بعد ٹاپ 9 شوٹرز فائنل راؤنڈ کیلئے کوالیفائی کریں گے۔
اس کے علاوہ کشمالہ طلعت خواتین کی 10 میٹر ائیرپسٹل ایونٹ میں ایکشن میں ہوں گی۔ان کا ایونٹ پاکستانی وقت کے مطابق دن ساڑھے 3 بجے ہوگا۔
ٹاپ 8 کی جنگ میں کشمالہ طلعت کا 44 شوٹرز سے مقابلہ ہوگا۔ کوالیفائی کرنے کی صورت میں دونوں کے فائنل راؤنڈز 28 جولائی کو ہوں گے۔
دوسری جانب پیرس اولمپکس میں شریک پاکستانی دستے کے اعزاز میں پاکستان ایمبسی میں تقریب منعقد ہوئی۔
فرانس میں پاکستان ایمبیسی میں ایتھلیٹس کیلئے میٹ اینڈ گریٹ سیشن کا انعقاد کیا گیا، جس میں وفاقی وزیر آئی پی سی رانا ثناء اللہ تقریب کے مہمان خصوصی تھے۔
تقریب میں فرانس میں سفارتی عملے کے ساتھ فرانس میں مقیم پاکستانیوں نے بھی شرکت کی۔
اس موقع پر فرانس میں مقیم پاکستانیوں نے قومی ایتھلیٹس کیلئے نیک خواہشات کا اظہار کیا۔تقریب میں ارشد ندی، فائقہ ریاض، احمد درانی اور جہاں آرا نبی نے شرکت کی۔
مزید خبریں :
اظہر علی کو پی سی بی میں اہم عہدہ مل گیا
22 نومبر ، 2024
