کھیل

اسٹیڈیمز بننے دیں بھارت سمیت سب ٹیمیں پاکستان آئیں گی: محسن نقوی

19 اگست ، 2024

اسٹیڈیمز بننے دیں بھارت سمیت سب ٹیمیں پاکستان آئیں گی: محسن نقوی — چیمپئنز ٹرافی سے قبل کراچی، لاہور اور راولپنڈی اسٹیڈیمز کی اپ گریڈیشن کا کام مکمل کرنا ایک چیلنج ہے: چیئرمین پی سی بی/ اسکرین گریب

لاہور: پاکستان کرکٹ بورڈ کے چیئرمین محسن نقوی نے کہا ہےکہ اسٹیڈیمز بننے دیں بھارت سمیت سب ٹیمیں پاکستان آئیں گی۔

چیئرمین پی سی بی محسن نقوی نے قذافی اسٹیڈیم لاہور کی مین بلڈنگ کی تعمیر کا پی سی بی عہدیداران، ایف ڈبلیو او دیگر کنسٹرکشن کمپنیوں کے نمائندوں کے ہمراہ جائزہ لیا اور ہدایات جاری کیں ۔

اس موقع پر میڈیا سے گفتگو میں انہوں نے کہا کہ ’جتنی تیزی سے ممکن ہے دن رات تعمیراتی کام جا ری ہے، چیمپئنز ٹرافی سے قبل کراچی، لاہور اور راولپنڈی اسٹیڈیمز کی اپ گریڈیشن کا کام مکمل کرنا ایک چیلنج ہے، پر امید ہیں کہ چیمپئنز ٹرافی سے قبل کام مکمل کر لیں گے، اسٹیڈیم مکمل ہونے دیں بھارت سمیت سب ٹیمیں آئیں گی‘۔

یہ بھی پڑھیں

انہوں نے کہا کہ ہمارے اور دنیا کے اسٹیڈیمز میں زمین آسمان کا فرق ہے، کوئی بھی اسٹیڈیم انٹرنیشنل معیار کا نہیں ہے، ہمیں اسٹیڈیمز کا معیار بڑھانا ہے ۔

محسن نقوی کا کہنا تھا کہ کسی قسم کی کوآرڈی نیشن میں کمی نہیں ہے، ہمیں سکیورٹی اداروں نے کہا کہ تماشائیوں کے بغیر میچز کرائیں اور اب ہم نے ٹیسٹ بھی مشاورت سے منتقل کیا ، مزید ردو بدل بھی ہو سکتا ہے یہ ایک چیلنج ہے۔

انہوں نے مزید کہا کہ قذافی اسٹیڈیم کے قریب ہوٹل کے لیے بلڈنگ لے لی ہے لیکن یہ ایک پیچیدہ مرحلہ ہے، ہفتہ 10 روز میں فیصلہ ہو جائے گا کہ یہ پروجیکٹ چیمپئنز ٹرافی سے قبل مکمل ہو سکتا ہے یا نہیں کیونکہ بلڈنگ کو ہوٹل کی شکل دینا ہے۔