09 فروری ، 2025 
انضمام الحق اور مصباح پی سی بی ہال آف فیم میں شامل
09 فروری ، 2025
لاہور: پاکستان کرکٹ ٹیم کے سابق کپتان انضمام الحق اور مصباح الحق کو باقائدہ طور پر پاکستان کرکٹ بورڈ کے ہال آف فیم میں شامل کرلیا گیا۔
انضمام الحق اور مصباح الحق کو ہال آف فیم میں شامل کرنے کی تقریب قذافی اسٹیڈیم لاہور میں منعقد ہوئی جہاں چیئرمین پی سی بی محسن نقوی نے انضمام الحق اور مصباح الحق کوہال آف فیم کیپ پہنائی اور پلا ک پیش کی۔
ہال آف فیم کیپ پہن کر انضمام الحق اور مصباح الحق نے گراؤنڈ کا چکر لگا یا اور شائقین کرکٹ نے سابق کپتانوں کا تالیاں بجا کر خیر مقدم کیا۔
چیئرمین پی سی بی نے دونوں کھلاڑیوں کی پاکستان کرکٹ کے لئے خدمات کی تعریف کرتے ہوئے کہا کہ یہ پاکستان کی خوش قسمتی ہے کہ ایسے شاندار کھلاڑی پیدا کیے جنہوں نے اپنے اسکلز اور سپورٹس مین اسپرٹ کو پوری دنیا میں دکھایا۔
انہوں نے کہا امید ہے کہ ہمارے نوجوان کرکٹرز بھی ان عظیم کھلاڑیوں کے نقش قدم پر چلتے ہوئے پاکستان کرکٹ کی پوزیشن کو مضبوط کریں گے۔
تقریب کے دوران آئی سی سی چیمپئنز ٹرافی کی نمائش بھی کی گئی جہاں سابق کپتانوں نے ٹرافی کے ساتھ تصویر بنوائی اور ٹرافی کو اٹھایا۔
واضح رہے پی سی بی نے گزشتہ ماہ 2024 کے لیے ہال آف فیم کرکٹرز کا اعلان کیا تھا جس میں سابق کپتان مشتاق احمد، انضمام الحق، مصباح الحق اور سعید انور کو شامل کیا گیا تھا۔
