دنیا

امریکا اوربرطانیہ کے درمیان جلد ایک عظیم تجارتی معاہدہ ہوگا: ڈونلڈ ٹرمپ

28 فروری ، 2025

امریکا اوربرطانیہ کے درمیان جلد ایک عظیم تجارتی معاہدہ ہوگا: ڈونلڈ ٹرمپ — امریکی صدر ڈونلڈ ٹرمپ کی برطانوی وزیراعظم سرکئیراسٹارمر ک سے وائٹ ہاؤس میں ملاقات میں ہوئی—فوٹو: رائٹرز

امریکی صدر ڈونلڈ ٹرمپ نے امکان ظاہر کیا ہے کہ امریکا اوربرطانیہ کے درمیان جلد ایک عظیم تجارتی معاہدہ ہوگا۔

غیرملکی میڈیا رپورٹس کے مطابق امریکی صدر ڈونلڈ ٹرمپ کی برطانوی وزیراعظم سرکئیراسٹارمر سے وائٹ ہاؤس میں ملاقات میں ہوئی جس میں یوکرین جنگ،نیٹو کے مستقبل ،تجارت اور ٹیرف سے متعلق امور پر بات چیت ہوئی۔

وائٹ ہاؤس میں ہوئی ملاقات میں صدرٹرمپ نے سر کئیراسٹارمر کو اسپیشل شخص قرار دیا جبکہ سرکئیراسٹارمرنے بادشاہ چارلس کی جانب سے صدر ٹرمپ کو سرکاری سطح پر دورہ برطانیہ کادعوت نامہ بھی دیا۔

اس موقع پر ٹرمپ نے گفتگو کرتے ہوئے کہا کہ شاہ چارلس کے دورہ برطانیہ کی دعوت قبول کی ہے، امریکا اوربرطانیہ کے درمیان جلد ایک عظیم تجارتی معاہدہ ہوگا۔

ٹرمپ نے کہا کہ روس یوکرین جنگ کا جلد خاتمہ چاہتا ہوں، یوکرین کے ساتھ معدنیات کا معاہدہ روس کےخلاف کیف کی سلامتی کی ضمانت ہے۔یوکرین جنگ بندی معاہدہ سب کے مفاد میں ہے۔

امریکی صدر نے کہا کہ یوکرین جنگ بندی کی کوششیں تیزی سے آگے بڑھ رہی ہیں، روس یوکرین جنگ بندی معاہدہ ابھی نہیں ہوا توپھرکبھی نہیں ہوسکے گا، اگر میں اُس وقت امریکی صدر ہوتا تو روس یوکرین جنگ نہ ہوتی۔

دوسری جانب برطانوی وزیراعظم سر کیئراسٹارمر نے کہا کہ امریکا اور برطانیہ کے درمیان تاریخی برادرانہ تعلقات ہیں، امریکی صدر کی امن سے متعلق کوششیں قابل تعریف ہیں، روس یوکرین جنگ بندی کی کوششوں میں امریکا کے ساتھ ہیں۔

برطانوی وزیراعظم نے کہا کہ برطانیہ اور امریکا تجارت، دفاع اور دیگر شعبوں میں اہم شراکت دار رہے ہیں، مستقبل میں بھی دنیا میں امن کیلئے امریکا کے ساتھ مل کرکام کریں گے۔