09 مارچ ، 2025 
'چیمپئنز ٹرافی فائنل میں بھارت کو ٹاس ہارنا چاہیے'، ایشون نے ایسا کیوں کہا؟
09 مارچ ، 2025
بھارت کے سابق اسپنر روی چندر ایشون نے اپنی خواہش کا اظہار کرتے ہوئے کہا کہ چیمپئنز ٹرافی کے فائنل میں بھارتی ٹیم کے کپتان روہت شرما کو ٹاس ہار جانا چاہیے۔
ایشون نے ان خیالات کا اظہار یوٹیوب شو کے دوران کیا جس میں ان کا کہنا تھا کہ چونکہ بھارتی ٹیم کامیابی کے ساتھ ٹوٹل کا دفاع کرتی آئی ہے اور بغیر کسی دباؤ کے ہدف کا تعاقب کیا ہے، اس لیے ٹاس ایک بڑا عنصر نہیں ہونا چاہیے اور روہت کو اس ٹینشن سے فری ہونا چاہیے کہ ٹاس جیت کر پہلے بولنگ کی جائے یا بیٹنگ۔
ایشون نے کہا دیکھا جائے تو بھارتی ٹیم اس وقت اپنی بہترین پوزیشن میں ہے، وہ ہر ٹوٹل کا دفاع کرتی نظر آئی ہے، بھارت کو ٹاس نہیں جیتنا چاہیے، نیوزی لینڈ کو جیت کر یہ فیصلہ کرنے دینا چاہیے کہ وہ پہلے کیا کرتے ہیں۔
سابق اسپنر کا کہنا تھا کہ بھارت پہلے بھی اسی ٹورنامنٹ میں نیوزی لینڈ کے خلاف کامیاب دفاع کرچکا ہے اور کیویز کو 44 رنز سے شکست دی ہے۔
انہوں نے کہا بھارتی ٹیم دوسری اننگز میں کامیابی سے بیٹنگ بھی کررہی ہے،اسی لیے ٹیم انڈیا کو اس چیز کا پریشر نہیں لینا چاہیے۔
سابق اسپنر ایشون کا مزید کہنا تھا کہ اس ٹورنامنٹ میں بھارتی ٹیم صرف بنگلادیش کے خلاف ذرا غیر آرام دہ نظر آئی، ورنہ وہ اس ٹورنامنٹ کی مضبوط ترین ٹیم رہی ہے۔
واضح رہے کہ آج بھارت اور نیوزی لینڈ کے درمیان چیمپئنز ٹرافی کا فائنل دوپہر 2 بجے دبئی انٹرنیشنل کرکٹ اسٹیڈیم میں شروع ہوگا۔
