کوئٹہ… خون عطیہ کریں اور زندگی کا تحفہ دیں، یہ ہے اس سال ورلڈ بلڈ ڈونرز ڈے کا پیغام۔ رگوں میں دوڑتے خون سے انسانی زندگی کی ڈور بندھی ہوئی ہے۔یہ احساس شدت سے اس وقت ہوتا ہے جب کسی بیماری یا حادثے کی صورت میں ہمارے کسی پیارے کو اچانک خون کی ضرورت پڑ جائے۔ایسے میں رضاکارانہ خون عطیہ کرنے والے افراد کا کردار کسی فرشتے سے کم نہیں جو کسی نفع ،نقصان اور رشتے کے بغیر اپنا خون دے کر ایک انسانی زندگی بچاتے ہیں۔ایک شہری کا کہنا تھا کہ میں ہر چار مہینے بعد خون دیتا ہوں، پہلے بھی تین چار دفعہ خون دے چکا ہوں جو بھی غریب بندہ ہوتا ہے اسے خون دے دیتا ہوں۔بلوچستان جیسے معاشرے میں شعور کی کمی کی وجہ سے خون عطیہ کرنے کا رجحان بہت کم ہے ۔ یہاں اس سلسلے میں خون عطیہ کرنیوالے فلاحی ادارے اور تنظیمیں کام کررہی ہیں ۔ماہرین کا کہنا ہے کہ ایک خاص مدت کے بعد خون دینا ڈونر کی صحت کیلیے بھی اہم ہے۔ایک وقت تھا کہ جب خون دینے کے حوالے سے شعور بہت کم تھا، لیکن اب لوگ آتے ہیں اور اپنے خون کا عطیہ دیتے ہیں۔ہر صحت مند انسان کو سال میں تین بار خون دینا چاہئے اور اس کا فائدہ یہ ہے کہ اس کے اپنے خون کا سکریننگ بھی ہوجاتا ہے اور اس کے ایچ آئی وی، ایچ بی ایس، ہیپاٹائی ٹس سی ، ملیریا اور سفلس سارے ٹیسٹ ہوجاتے ہیں۔ کسی بیمار کو خون دینا ایک اخلاقی فریضہ ہے۔ ماہرین کہتے ہیں کہ اس سلسلے میں شعور اور آگاہی سے کئی مریضوں کی جان بچائی جاسکتی ہے۔