پیرس........رضا چوہدری........ فرانس میں ہونے والے بلدیاتی انتخابات کے پہلے راونڈ میں سابق صدر نکولس سرکوزی کی قدامت پسند جماعت (یو ایم پی) نے نمایاں کامیابی حاصل کی ہے۔ انتخابات میں موجودہ صدر فرانسس اولاندے کی جماعت (سوشلسٹ پارٹی) کی ناقص کارکردگی کی بنا پر بہت کم ووٹ ملے اور میڈیا میں اس کی توقع پہلے ہی کی جارہی تھی۔ لیکن حکمران جماعت نے رائے دہندگان پر زور دیا تھا کہ وہ ووٹ کا حق ضرور استعمال کریں۔ پہلے راونڈ کے لیے ہونے والے انتخابات ابتدائی نتائج کے مطابق (یو ایم پی) اور اس کی اتحادی جماعتوں نے31 فیصد ووٹ حاصل کیے۔ دوسرے نمبر پر انتہائی دائیں بازو کی جماعت (نیشنل فرنٹ) رہی، جسے غیر حتمی نتائج کے مطابق24 فیصد ووٹ ملے، جبکہ حکمران (سوشلسٹ پارٹی) 19فیصد ووٹوں کے ساتھ تیسرے نمبر پر رہی ہے۔ فرانس میں گزشتہ چند برسوں کے دوران (نیشنل فرنٹ) کی مقبولیت میں نمایاں اضافہ ہوا ہے، جس نے فرانس کی مرکزی سیاسی جماعتوں میں تشویش کی لہر دوڑا دی ہے۔ میری لی پین کی سربراہی میں قائم انتہائی دائیں بازو کے نظریات کی حامل یہ جماعت فرانسیسی معاشرے میں تارکینِ وطن خصوصاً مسلمانوں کے انضمام کی سخت مخالف ہے اور فرانس کی یورپی یونین میں موجودگی کی بھی مخالفت کرتی ہے۔ فرانس کی سیاست میں (سوشلسٹ) اور (یو ایم پی) ایک دوسرے کی روایتی حریف ہیں، لیکن بلدیاتی انتخابات سے قبل دونوں جماعتوں نے رائے دہندگان کو خبردار کیا تھا، کہ وہ (نیشنل فرنٹ) کو اقتدار میں آنے سے روکنے کے لیے اپنا حقِ رائے دہی ضرور استعمال کریں۔ انتخابات کا اگلا دور آئندہ اتوار 29مارچ کو ہوگا، جس میں بلدیاتی حلقوں میں سرِ فہرست رہنے امیدوارں کے درمیان ون ٹو ون مقابلہ ہوگا۔ دوسرے مرحلے سے قبل (یو ایم پی) اور (سوشلسٹ) دونوں کے رہنماوں نے عوام سے اپیل کی ہے کہ وہ جماعتی وابستگی سے بالاتر ہوکر اپنے اپنے حلقے میں اس امیدوار کو ووٹ دیں جو (نیشنل فرنٹ) کے امیدوار کو ہرانے کی صلاحیت رکھتا ہو۔