بڈاپسٹ.......ہنگری کی افواج نے ملک کی جنوبی سرحدوں سے آنے والے تارکین وطن کو کنٹرول کرنے کےلیے ممکنہ طور پر سرحدی مشقیں شروع کی ہیں۔بڈاپسٹ کے حکام نے جنوبی سرحدوں پر پولیس کے ساتھ فوجیں تعینات کرنے منصوبہ بنایا ہے۔سربیا اور ہنگری کی سرحد پر پہلے ہی ایک خاردار تار اور باڑ لگادی گئی ہے۔

رواں ماہ کے آخر میں یورپی یونین کے ممبران کا سرحدوں کے سخت حفاظتی اقدامات کے حق میں ووٹنگ متوقع ہے۔حکام کو بتایا گیا ہے کہ اگلے ہفتے تک ان مہاجرین کی تعداد 40000 تک جاسکتی ہے۔ان میں سے زیادہ تر مہاجرین شام اور لیبیا کے جنگ زدہ علاقوں سے فرار حاصل کرنے کے لیے ہنگری کے راستے جرمنی، آسٹریا اور سویڈن میں داخل ہونا چاہتے ہیں، جو یورپی یونین کے خوشحال ممالک ہیں اور وہاں پناہ گزینوں کے لیے قوانین میں نرمی کی گئی ہے۔

دوسری جانب پناہ کے لیے یورپ کا رخ کرنے والے تارکینِ وطن کی تعداد کم نہ ہونے کے بعد یورپی یونین میں شامل ممالک پناہ گزینوں کے بار کو برداشت کرنے کے معاملے پر یورپی کمیشن میں اپیل کرنے پر غور کر رہے ہیں۔

گذشتہ روز یورپی کمیشن کے سربراہ ژان کلود ینکر نے یورپ میں پناہ گزینوں کے مسئلے سے نمٹنے کے لیے ایک منصوبے کا اعلان کیا ہے جو ان کے بقول اس کے جامع، فوری اور دیرپا حل کو ممکن بنا سکتا ہے۔اس منصوبے کے تحت ایک لاکھ 20 ہزار اضافی پناہ گزینوں کو یورپی ملکوں میں کوٹے کی بنیاد پر تقسیم کرنے کی تجویز دی گئی ہے۔

بدھ کو ہنگری کی فوج نےکارروائی سے قبل مشقوں کا آغاز کیا۔ ہنگری نے حال ہی میں سربیا کے ساتھ 175 کلومیٹر طویل سرحد پر خار دار تاروں اور باڑ لگانے کا کام مکمل کیا ہے جبکہ ایک اور سرحدی رکاوٹ پر بھی کام جاری ہے۔