16 اکتوبر ، 2016
کراچی کی اہم ترین شاہراہیں بند ہونے سے شہری مشکلات کا شکار ہیں جبکہ راستوں کی بندش کے باعث ایمبولینسوں کو بھی راستہ نہیں مل سکا اور مریض اسپتال نہ پہنچ سکے۔
کراچی میں پیپلز پارٹی کی جانب سے سانحہ کارساز کے شہداء کو خراج عقیدت پیش کرنے کیلئے ’سلام شہداء‘ ریلی کا انعقاد کیا گیا جس کی قیادت چیئرمین پیپلز پارٹی بلاول بھٹو زرداری کررہے ہیں۔
سلام شہداء ریلی کے باعث کراچی کی اہم ترین شاہراہیں بند کردی گئیں جن میں شارع فیصل، ایم اے جناح روڈ اور کوریڈور تھری شامل ہیں جبکہ سول اسپتال اور جناح اسپتال جانے والے راستے بھی بند کردئیے گئے ہیں۔
شہریوں نے بلاول بھٹو زرداری سے اسپتال کے راستے کھلوانے کی اپیل کی ہے۔