حکومت نے حلقہ بندیوں سے متعلق بل پر اپوزیشن سے مدد مانگ لی

اسلام آباد: حکومت نے حلقہ بندیوں سے متعلق بل پر اپوزیشن سے مدد مانگ لی۔

سینیٹ کے گزشتہ اجلاس میں حکومت کی جانب سے نئی حلقہ بندیوں کا بل پیش کیے جانا تھا لیکن ارکان کی تعداد کم ہونے کے باعث بل پیش نہ کیا جاسکا۔

ذرائع کا کہنا ہے کہ سینیٹ اجلاس میں آج یہ بل پیش کیے جانے کا امکان ہے جسے منظور کرانے کے لیے حکومتی کوششیں شروع ہوگئی ہیں اور حکومت نے اپوزیشن سے مدد مانگ لی ہے۔

نااہل شخص کو پارٹی سربراہی سے روکنے کا ترمیمی بل قومی اسمبلی میں مسترد

پیپلز پارٹی کی جانب سے پیش کیے گئے الیکشن ایکٹ ترمیمی بل کے حق میں 98 اور مخالفت میں 163 ووٹ ڈالے گئے

جیونیوز سے گفتگو میں اپوزیشن لیڈر خورشید شاہ نے بتایا کہ وزیراعظم شاہد خاقان عباسی نے ان سے رابطہ کیا اور نئی حلقہ بندیوں سے متعلق قانون سازی کے لیے سینیٹ میں ساتھ دینے کی درخواست کی۔

خورشید شاہ کے مطابق وزیراعظم نے پیپلزپارٹی کی اعلیٰ قیادت سے ملاقات کی خواہش کا بھی اظہار کیا اور آصف زرداری یا بلاول بھٹو سے ملاقات کرانے کا کہا جس پر انہوں نے جواب دیا کہ وہ اپنی پارٹی قیادت سے صرف رابطہ کراسکتے ہیں لیکن فیصلے کا معاملہ ان کے اختیار سے باہر ہے، ساتھ دینے یا نہ دینے کا فیصلہ پارٹی مل بیٹھ کر کرےگی۔

خورشید شاہ کا کہنا تھا انہوں نے وزیراعظم کو بتادیا کہ آپ کا پیغام اپنی قیادت کو پہنچا دیا ہے اس سے زیادہ مدد نہیں کرسکتا، بہتر ہے حکومت تحریری طور پر درخواست دے تاکہ قیادت سے مشورہ کیا جاسکے۔